Sekretari i Përgjithshëm i NATO-s, Jens Stoltenberg, i tha CNN në një konferencë të sigurisë në Mynih se askush nuk e di se kur do të përfundojë lufta në Ukrainë, por se nuk ka shenja se presidenti rus Vladimir Putin ka ndryshuar ambiciet e tij.

“Ne shohim të kundërtën. Putini nuk po planifikon paqen, ai po planifikon më shumë luftë”, tha Stoltenberg.

Stoltenberg, duke treguar për luftimet në Bakhmut në lindje të Ukrainës, tha se rusët tashmë po nisin operacione sulmuese.

“Është e vështirë të thuhet nëse është një ofensivë e madhe apo është thjesht një lloj preludi për një ofensivë të madhe. Por gjithnjë e më shumë ushtarë dhe armë ruse po mbërrijnë atje. Rusia po përpiqet të kompensojë pajisjet dhe logjistikën e dobët me më shumë trupa. Është si hedhja e valëve të njerëzve në vijat mbrojtëse, një lloj luftimi që nuk është parë që nga Lufta e Parë Botërore.

Nëse nuk ju intereson aq shumë për jetën e njerëzve, atëherë thjesht hidhni gjithnjë e më shumë prej tyre në luftë. Nëse duam që Ukraina të mbizotërojë si një komb sovran dhe nëse duam një zgjidhje paqësore nesër, atëherë duhet t’i japim mbështetje ushtarake sot. Efektiviteti i negociatave varet nga forca në fushën e betejës”, tha shefi i NATO-s për CNN.