OJQ “YouCanDo” ka nisur sot një aktivitet dyditor në sheshin “Zahir Pajaziti” në Prishtinë, në kuadër të Javës Ndërkombëtare të Njerëzve me shkop të bardhë.

Aktiviteti ka për qëllim sensibilizimin e qytetarëve për sfidat me të cilat përballen personat me dëmtime në shikim dhe personat e tjerë me aftësi të kufizuara, raporton KosovaPress.

Në kuadër të aktivitetit është vendosur një tendë e errët, ku qytetarët kanë mundësi të hyjnë dhe të përjetojnë përkohësisht vështirësitë e personave të verbër, përmes përdorimit të syzeve të errëta dhe qëndrimit në ambient pa dritë.

Kryetari i organizatës “YouCanDo”, Jusuf Fazliu, tha se aktiviteti synon t’u mundësojë qytetarëve ta kuptojnë më nga afër përditshmërinë e personave me dëmtime në shikim.

“Ky është një aktivitet sensibilizues që po e mbajmë sot dhe nesër, ku qytetarët mund ta përjetojnë verbërinë përmes tendës së errët dhe syzeve”, tha Fazliu.

“Është një thirrje e vazhdueshme për qytetarët që të vetëdijesohen dhe t’i kuptojnë problematikat me të cilat përballen personat me aftësi të kufizuara”, tha Hasani.

Ajo kritikoi institucionet për, siç tha, mungesë të veprimeve konkrete në adresimin e problemeve të kësaj kategorie.

Aktiviteti i organizuar nga OJQ “YouCanDo” do të vazhdojë edhe gjatë ditës së nesërme në sheshin “Zahir Pajaziti” në Prishtinë.