Antoine Griezmann ka njoftuar pensionimin e tij nga kombëtarja franceze.

33-vjeçari ka vendosur që t’i japë fund angazhimit të tij mbi një dekadë me fanellën e dy herë kampionëve të Botës.

Përgjatë kësaj dekade ai ka qenë njëri nga lojtarët më të rëndësishëm të “Gjelave” në sukseset e kësaj kombëtare.

Griezmann debutoi me Francën në mars të vitit 2014, teksa e ka veshur këtë fanellë në 137 paraqitje, prej të cilave ka shënuar 44 gola.

Anëtari i Atleticos është në top pesëshën e golashënuesve në historinë e kësaj kombëtare.

Ai fitoi Kupën e Botës me Francën në vitin 2018, teksa arriti në finalen e Botërorit në vitin 2022 si dhe në finalen e “EURO 2016”.

Në vitin 2016, Griezmann ishte shpallur futbollisti i vitit në Francë.