Zëvendëskryeministri i parë i vendit, Besnik Bislimi ka publikuar dokumentin e Akademisë së Shkencave dhe Artit në Serbi, lidhur me krijimin e Asociacionit në Kosovë.

Ai ka thënë se në përmbajtjen e këtij dokumenti Serbia haptazi po e kërkon Asociacionin për integrim të serbëve, por të jetë si “Kali i Trojës’’, për të përgatitur ndarjen e Kosovës, raporton Gazeta10.

‘’Kosova vazhdimisht ka paralajmëruar komunitetin ndërkombëtar për arsyen e vërtetë të Serbisë për insistimin e formimit të AKS-së. AKS-ja kurrë nuk ka pasur qëllim t’i integrojë serbët lokal në Kosovë, por të jetë “Kali i Trojës” i Beogradit për ta bërë shtetin jofunksional, duke përgatitur mënyrën për ndarje të Kosovës. “Non-paperi” i fundit i draftuar nga Akademia e Shkencave dhe e Artit e Serbisë (nga Vasilije Krestiq, anëtar,https://www.sanu.ac.rs/en/member/krestic-vasilije/) ofron dëshminë më të fuqishme deri më tash për qëllimet e vërteta të Serbisë prapa insistimit për AKS-në në Kosovë.’’, ka shkruar ai.

Tutje, ai ka thënë se ky dokument tregon qëllimin e Serbisë për të krijuar atë që njihet si “Bota serbe” përmes një Asociacioni që do të kaloj në Republikë Serbe brenda Kosovës, gjë që do të dërgojë në mos funksionimin e plotë të Republikës sonë, sepse ndërkombëtarët do të ua njohin autonominë absolute serbëve.

Më poshtë gjeni pasojat për Kosovën që ka renditur Bislimi me krijimin e një Asociacioni të tillë:

Dokumenti i bashkangjitur do të tregojë si më poshtë:

a. Krijimi i AKS-së nuk është objektiv në vete, por paraqet një hap të rëndësishëm drejt arritjes së synimit për “Botën serbe” që koincidon me territorin e ish-Jugosllavisë.

b. “Srpski svet” është evolucion i “Nacertanje” (https://researchgate.net/…/41119069_Ilija_Garasanin…) dhe duhet të shihet si “Nacertanje” e shekullit të 21-të.

c. Dizajni fillestar i AKS-së nuk është relevant, pasi kompetencat do të evolojnë dhe do të eksploatohen për shkak të përkrahjes financiare të Beogradit dhe një mungese relative të mbikëqyrjes nga Qeveria e Kosovës.

d. Këto kompetenca do të çojnë te një Republika Srpska e re me synim për ndarje territoriale mes territoreve shqiptare e serbe. Kjo më pas do të shtyjë komunitetin ndërkombëtar të njohë ekzistimin e dy entiteteve nacionale në Kosovë dhe një autonomi absolute në zonat e AKS-së.

e. Kjo autonomi do të sjellë një situatë që serbët nuk do të kenë nevojë për të ndërvepruar me Qeverinë e Kosovës, duke e bërë kështu AKS-në si një “parazit” në territorin e Kosovës.

f. Serbia beson se avantazhi kryesor krahasues që ka aktualisht, dhe duhet të shfrytëzojë, është superioriteti ekonomik në rajon.

g. Në rrethanat aktuale, qëllimi përfundimtar “Bota serbe” nuk mund të realizohet vetëm me mjete politike. Duhet të shfrytëzohen edhe mjete të tjera, duke përfshirë mekanizma fetar me potencial për ndikim politik në vendet fqinje ku vepron Kisha Ortodokse Serbe.

h. Prandaj, themelimi i AKS-së duhet të jetë imperativ kyç për politikanët serb, duke ofruar një bërthamë për qëllimin shekullor të bashkimit të kombit serb.

‘‘Non-paper’’ shpjegon në mënyrë të përsosur këmbënguljen e Beogradit për AKS-në, por duhet të bëjë komunitetin ndërkombëtar të rishqyrtojë këmbënguljen e vet./Gazeta10