Bordi Drejtues i Shërbimit Spitalor dhe Klinik Universitar të Kosovës ka kërkuar ndërmarrjen e masave konkrete për përmirësimin e cilësisë së shërbimeve shëndetësore, rritjen e performancës së klinikave dhe forcimin e llogaridhënies nga menaxhmentet e spitaleve rajonale.

Në mbledhjen e mbajtur të premten, Bordi ka theksuar nevojën që menaxhmentet e spitaleve rajonale të mbajnë përgjegjësi për adresimin e mangësive të identifikuara dhe zbatimin e rekomandimeve të auditimit.

Në kuadër të trajtimit të gjetjeve të auditimit, ShSKUK-ja ka bërë të ditur se kanë nisur procedurat disiplinore ndaj personave për të cilët janë evidentuar dyshime për shkelje. .

“Në kuadër të adresimit të gjetjeve të auditimit, kanë filluar procedurat disiplinore ndaj personave për të cilët janë evidentuar dyshime për shkelje. Bordi Drejtues do të informohet në vazhdimësi për punën e Komisionit Disiplinor, ecurinë e procedurave dhe masat që do të ndërmerren”.

Po ashtu, Bordi ka kërkuar që rekomandimet e auditimit të brendshëm dhe të jashtëm të shoqërohen me përgjegjësi të përcaktuara, afate kohore dhe raportim të rregullt për zbatimin e tyre.

“Lidhur me rekomandimet e auditimit të brendshëm dhe të jashtëm, Bordi kërkoi përcaktimin e përgjegjësive dhe afateve konkrete, si dhe raportim periodik mbi progresin dhe dëshmi për zbatimin e tyre”.

Një tjetër çështje e trajtuar në mbledhje ishte përmirësimi i cilësisë dhe sigurisë së shërbimeve shëndetësore.

“Bordi kërkoi që nga menaxhmentet e spitaleve rajonale të kërkohet përgjegjësi për adresimin e mangësive të identifikuara, zbatimin e rekomandimeve të auditimit dhe përmirësimin e performancës institucionale, përmes përcaktimit të masave konkrete, personave përgjegjës dhe afateve të zbatimit”, thuhet në komunikatën e këtij institucioni.