Gazeta10

Facebook Instagram Youtube

Krasniqi-Goodman: Kriminelët serbë të lirë, çlirimtarët po gjykohen – t’i mbështesim më 2 prill

LAJMET KRYESORE
Kina akuzon Avdullah Hotin dhe disa deputetë se “ia shkelën sovranitetin territorial”
Pas Haki Abazit, nga nesër një tjetër deputet largohet nga Vetëvendosje
Madhështore, Jakaj sypatrembur mposht serbin, Nikolic
Agim Ademit i përkeqësohet gjendja pas ndalimit policor (Video)
U bë virale në rrjetet sociale, flet zëdhënësja e “KRU Prishtina”, e cila me laps e letër ftoi konsumatorët ta shkarkojnë aplikacionin
Turqia goditet sërish nga tërmeti

Krasniqi-Goodman: Kriminelët serbë të lirë, çlirimtarët po gjykohen – t’i mbështesim më 2 prill

18:43

Ish-deputetja e Lëvizjes Vetëvendosje dhe njëra nga viktimat që ka denoncuar publikisht dhunimin seksual gjatë luftës, Vasfije Krasniqi – Goodman, ka kërkuar nga qytetarët që të bashkohen në marshin “Liria Ka Emër” për solidarizim me ish-krerët e Ushtrisë Çlirimtare të Kosovës që po gjykohen në Hagë.

Krasniqi-Goodman thotë se kriminelët serbë që dhunuan mbi 20 mijë gra kosovare janë të lirë ndërsa ata që po gjykohen janë çlirimtarët për çka konsideron se është shumë e rëndësishme që të gjithë bashkë të marshojnë në mbështetje të tyre, njofton Klankosova.tv.

“Drejtësia – kaq shumë e kërkuar nga unë dhe mbi 20 mijë gra tjera në Kosovë, viktima të dhunës seksuale, nuk erdhi asnjëherë. Kriminelët serbë, shkaktarë të këtyre dhunimeve, akoma enden të lirë nëpër Serbi. Fatkeqësisht, sot, të vetmit të cilët po ballafaqohen me një proces gjyqësor janë çlirimtarët tanë, ish-krerët e UÇK-së”.

“Prandaj, është tejet e rëndësishme që të gjithë, pa përjashtim, si shoqëri dhe si shtet, të bëhemi bashkë dhe të dalim në Marshin për Drejtësi në mbështetje të çlirimtarëve tanë, të organizuar nga iniciativa ‘Liria Ka Emër’. Ju ftoj që me 2 prill, në sheshin ‘Zahir Pajaziti’ në Prishtinë, të bashkoheni e të marshoni. Me zemër jam me ju”, ka shkruar ish-deputetja në Facebook./Gazeta10

BE: Në ditët në vijim nisim me hapat e parë të fazës së zbatimit të marrëveshjes

17:04

Çështja e dialogut mes Kosovës dhe Serbisë, përkatësisht dakordimi i arritur mes kryeministrit Albin Kurti dhe presidentit Aleksandar Vuçiq, më 18 mars në Ohër, për zbatimin e Marrëveshjes drejt normalizimit të marrëdhënieve mes dy vendeve, ishte pjesë e diskutimit të liderëve të Bashkimit Evropian në samitin e BE-së.

Shtetet e BE-së në takimin e së enjtes, sipas zëdhënësit të BE-së, Peter Stano, u kanë bërë thirrje Kosovës dhe Serbisë që të zbatojnë shpejtë detyrimet që rrjedhin nga takimi i Ohrit.

“Liderët evropianë në takimin e tyre në Bruksel këtë të enjte i bënë thirrje Kosovës dhe Serbisë që të zbatojnë shpejt dhe me mirëbesim detyrimet e tyre përkatëse që rrjedhin nga takimi i Ohrit. Të dyja palët ranë dakord në Ohër që të fillojnë menjëherë zbatimin e të gjitha dispozitave të Marrëveshjes dhe Aneksit. Teksti i rënë dakord thotë qartë: “Kosova dhe Serbia angazhohen plotësisht të respektojnë të gjitha nenet e Marrëveshjes dhe këtë aneks””- ka thënë Stano në një përgjigje për KALLXO.com.

Stano thekson se në ditët në vijim, institucionet e BE-së do të nisin hapat e parë të fazës së zbatimit të marrëveshjes.

“Në ditët në vijim, tani me miratimin nga Këshilli Evropian (Udhëheqësit e të 27 Shteteve Anëtare) institucionet e BE-së do të iniciojnë procesin për operacionalizimin e hapave të parë të fazës së zbatimit së bashku me Palët. Siç tha Përfaqësuesi i Lartë të enjten: ‘Unë do t’i këshilloja ata të bëjnë punën e tyre’”- tha Stano.

Më tej, Stano shtoi se shefi i diplomacisë së BE-së, Josep Borrell ka informuar liderët evropianë për bisedimet e Ohrit dhe theksoi se Kosova dhe Serbia duhet të përmbushin atë se për çka janë pajtuar, duke shtuar se “çdo spekulim për nënshkrimin apo vlefshmërinë e Marrëveshjes është i kotë”.

“Përfaqësuesi i Lartë Josep Borrell informoi liderët evropianë për bisedimet e Ohrit dhe theksoi se Kosova dhe Serbia tani duhet të përmbushin atë që kanë rënë dakord. Ai gjithashtu kujtoi se çdo spekulim për nënshkrimin apo vlefshmërinë e Marrëveshjes është i kotë. Historia e dialogut ka dëshmuar se rëndësia e marrëveshjes matet nga niveli i zbatimit të saj, jo nënshkrimi. Ai ishte shumë i qartë se marrëveshja është rënë dakord, duhet zbatuar dhe nuk ka vend për zgjedhje”- është shprehur Stano duke cituar Borrell.

Zëdhënësi i BE-së shton se Kosova dhe Serbia do të jenë të detyruara kontraktualisht të zbatojnë dispozita nëse dëshirojnë të bëjnë përparim drejt BE-së, duke theksuar se “moszbatimi do të thotë të braktisësh rrugën drejt BE-së”.

“Dispozitat e Marrëveshjes (përfshirë Aneksin) tani do të inkorporohen në Kapitullin 35 për Serbinë dhe në agjendën e Grupit Special për Normalizimin për Kosovën. Kjo do të thotë se palët do të jenë të detyruara kontraktualisht të zbatojnë dispozitat nëse dëshirojnë të bëjnë përparim drejt BE-së. Moszbatimi do të thotë të braktisësh rrugën drejt BE-së”- ka deklaruar Stano për KALLXO.com.

Më 18 mars, Kosova dhe Serbia në Ohër të Maqedonisë së Veriut u dakorduan për Aneksin e zbatimit të Marrëveshjes drejt normalizimit.

Palët nuk e nënshkruan marrëveshjen, por BE-ja dhe Shtetet e Bashkuara janë deklaruar se pavarësisht se nuk është firmosur, ajo është marrëveshje e obligueshme për palët.

Marrëveshja, prej 11 nenesh, nuk përmend në mënyrë specifike njohjen e ndërsjellë. Megjithatë, dokumenti kërkon nga të dyja vendet që t’i pranojnë dokumentet dhe simbolet e njëra-tjetrës, përfshirë: pasaportat, diplomat dhe targat.

Dokumenti kërkon, gjithashtu nga palët që t’i zbatojnë të gjitha marrëveshjet e arritura deri më tash në dialogun për normalizimin e marrëdhënieve, përfshirë edhe atë për formimin e Asociacionit të komunave me shumicë serbe në Kosovë, të cilin Qeveria e Kosovës e ka refuzuar deri më tash, me arsyetimin se mund të rrezikojë funksionalitetin e shtetit.

Ndërkaq, Kurti dje ka folur për ofertën që thotë se ia ka bërë presidentit serb, Aleksandar Vuçiq për vetë-menaxhim të serbëve të Kosovës në takimin e Ohrit.

Kreu i ekzekutivit tha se gjatë bisedimeve, i ka bërë ofertë palës serbe që nëse të njëjtit pranojnë tri shtylla bazike, Kurti është shprehur i gatshëm që të shkruaj draftin për vetë-menaxhimin.

“Për ketë formulimin e vetë-menaxhimit të komunitetit serb, dhe në anën tjetër këto marrëveshjet e trashëguara, e që kanë pësuar rrëzim nga institucionet tona e janë shkelur nga Serbia, unë kam bërë një ofertë konkrete, duke i thënë se nëse pala serbe është dakord që të pranoj tri shtylla bazike; Kushtetutën e Kosovës, aktgjykimin e Gjykatës Kushtetuese dhe një qëndrim të Brukselit dhe Uashingtonit se çka është dhe nuk është asociacioni, unë jam i gatshëm të shkruaj draftin”- tha Kurti.

I pari i Qeverisë u shpreh se nuk ka pasur dakordim që të përfillen shtyllat e përmendura teksa shtoi se kishte “refuzim shumë të ashpër të ofertës”.

Besnik Tahiri ia numëron dështimet qeverisë: Dy vite regres dhe kriza

16:59

Shefi i gurpit parlamentar nga radhët e AAK-së Besnik Tahiri, ka kritikuar qeverinë e Kosovës për dy vite të punës së saj, ku tha se kemi pasur regres.

Tahiri tha se në tendecë për ta kapur çdo institucion, hartuan legjislacion në kundërshtim me parimet kushtetuese

“Dy vite regres!

Anti-kushtetutshmëria
Në tendencë për ta kapur çdo institucion, hartuan legjislacion në kundërshtim me parimet kushtetuese dhe ndarjes së pushteteve, por që prap se ndalen kritikën se tjerët i bllokuan, e se gardiani i kushtetushmërisë u bë ‘pengesa e reformave’”, ka thënë ai.

Tutje Tahiri ka numëruar edhe dështimet e tjera të qeverisë Kurti, si rritjen e çmimeve, regresioni ekonomik, ikja e popullit nga Kosova si dhe të tjera.

“Rritja e çmimeve
Me veprim (ngritje të çmimit të energjisë, tatimi në pronë) e mos veprim (ulje të taksave, akzisës) në politika tatimore, masa rregullative e vendime, goditën shtresën e mesme, futën duart në xhepat e qytetarëve por nuk u ndalën së krekosuri për rritje të hyrave tatimore, e për të gjetur fajtorë komunat.

Regresi ekonomik
Bllokuan bizneset, ndaluan investimet, ndalën zhvillimin ekonomik lokalë, rrezikuan zinxhirin ekonomik, por su ndalën së shpërndari mjegull për buxhetet më të mëdha historike.

Trusti
Në vend se tu japin qasje qytetarëve në mjetet e tyre për ta kapërcyer inflacionin, me papërgjegjshmërinë e tyre inflacioni i mori ato për favorizuar tregjet ndërkombëtare.

Lufta me zyrtarë publik dhe sindikata
Dëshpruan çdo shërbyes publik. Në vend të se të garantojnë mirëqenie me ngritjen e pagave, ata tallën e sulmuan partnerët socialë.

Ikja prej Kosovës
Vulosën zbrasjen, braktisjen e Kosovës, sepse tashmë shfrytëzuan një brez të diasporës, ju duhet një kontigjent i ri”, ka shkruar Tahiri në Facebook./Gazeta10

​Osmani: S’mund të ketë paqe e stabilitet pa drejtësi për krimet që i bëri Serbia

15:40

Presidentja Vjosa Osmani ka përkujtuar 24-vjetorin e masakrave nga regjimi gjenocidal i Serbisë, në të cilat u vranë 75 civilë në Celinë, 68 në Fortesë dhe 49 në Brestoc të Rahovecit.

“Në këtë përvjetor, e kujtojmë secilin civil që ra për lirinë e vendit dhe të gjithë dëshmorët e UÇK-së që e bën të mundshme lirinë tonë”, tha ndër të tjera ajo.

Deklarata e plotë e presidentes Osmani:

Sot bëhen 24-vjet që kur forcat e regjimit gjenocidal të Serbisë vranë 75 civilë në Celinë, 68 në Fortesë dhe 49 në Brestoc të Rahovecit.

Në këtë ditë në mbrojtje të popullsisë civile, ranë edhe pesë dëshmorë të UÇK-së.

Në këtë përvjetor, e kujtojmë secilin civil që ra për lirinë e vendit dhe të gjithë dëshmorët e UÇK-së që e bën të mundshme lirinë tonë.

Nuk mund të ketë paqe e stabilitet pa drejtësi për krimet që ka bërë Serbia kudo në Kosovë.

Sjellja e kriminelëve para drejtësisë është përpjekje e jona e çdoditshme.

Qoftë i përhershëm kujtimi për civilët dhe dëshmorët!

PSD-ja hedh tym para objektit të Qeverisë

14:58

Kreu i PSD-së, Dardan Molliqaj ka mbajtur fjalim para Qeverisë së Kosovës ku edhe në mënyrë simbolike janë vendosur flamuj të bardhë.

Ndërkohë aktivistët e PSD-së kanë improvizuar edhe me “tym të zi”, për të treguar atë që Molliqaj e quan “humbje të perspektivës së Kosovës”

“Kjo marrëveshje paraqet zymtësi dhe i ftojmë qytetarët që ta kundërshtojnë”, ka thënë Molliqaj.

Pas këtij veprimi simbolik, Molliqaj e ka shpallur të mbyllur protestën.

Flamujt e bardhë ngjiten para Qeverisë, Molliqaj: Kurti u dorëzua

14:40

Aktivistët e PSD-së kanë hequr flamujt e Kosovës përpara objektit të Qeverisë së Kosovës, raporton Ekonomia Online.

Në vend të tyre janë vendosur flamuj të bardhë. Për simbolikën e tyre ka folur Dardan Molliqaj.

Ai ka thënë se ata janë vendosur për të treguar se Kurti është dorëzuar. Molliqaj ka thënë se “Zajednica” si emër Kurti e ka përdorë për të sulmuar kundërshtarët e kaluar, por tani nuk po e quan “Zajednicë” por po e quam vetëmenaxhim.

“Këta flamuj u zëvendësuan në mënyrë simbolike për të treguar që kryeministri i Kosovës është dorëzuar. Ne e duam Kosovën e UÇK-së, Kosovën e 14 Shkurtit. Albini ja ka ndërru mbiemrin vetës nga Kurti sot është Albin Zajednica”, ka thënë Molliqaj.

“S’ka emër që e zëvendëson atë që po i ndodh Kosovës. Ajo që po i ndodh Kosovës është e qartë. Është autonomi territoriale etnike për komunitetin serb në Kosovë. Po ashtu, autonomi ose zona të veçanta që kanë karakter eksterritorial përreth kishave dhe manastireve ortodokse”.

Ai tha se Qeveria Kurti pikërisht pse e ka shumicën po e ka keqpërdor interesin e asaj shumice. Derisa, Molliqaj ka përmendur edhe idenë për ndryshim kufijsh.

“Refuzimi i marrëveshjes së ripërcaktimin të kufijve, duke e etiketuar Shtëpinë e Bardhë, duke e përjashtuar Luginën e Preshevës dhe në anën tjetër duke e pranuar Zajednicën në vilën e Titos nuk është e rastësishme”.

Molliqaj tha se Kurti me këtë refuzim të kësaj ideje ka refuzuar bashkimin me Luginën.

LIVE: Fillon protesta e PSD-së, kërkohet dorëheqja e Kurtit pas marrëveshjes së Ohrit

14:23

Partia Socialdemokrate së bashku me një numër të madh të qytetarëve po protestojnë sot kundër marrëveshjes në mes Kosovës dhe Serbisë. Marrëveshje kjo e arritur në Ohër, të datës 18 mars të këtij viti, e rrjedhimisht edhe kundër themelimit të Asociacionit të komunave me shumicë serbe.

Gjatë kësaj proteste, ata kanë kërkuar edhe dorëheqjen e kryeministrit Albin Kurtit.

Shumë prej tyre, në duar mbajnë pankarta me fotografinë e kryeministrit Kurti dhe kryetarit të Kuvendit Glauk Konjufca, që pasqyrohen e etiketohen si gënjeshtarë.

Protestuesit janë nisur nga sheshi “Zahir Pajaziti” dhe janë ndalur para ndërtesës së Qeverisë së Kosovës.

Protesta është duke u mbështetur edhe nga Nisma Socialdemokrate, përfaqësues të të cilës së bashku me ata të PSD-së i kanë prirë kësaj proteste. 

Gazeta10 do të ju mbajë të informuar…

Tahiri për deklaratën e Haxhiut: Konflikt i pastër interesi, mjerim i madh që po mundohet ta arsyetojë

14:00

Shefi i Grupit parlamentar të Partisë Demokratike të Kosovës, Abelard Tahiri në konferencë për media ka folur për vendimin e Gjykatës Kushtetuese lidhur me ligjin e Këshillit Prokurorial të Kosovës.

Tahiri e cilëson vendimin e Kushtetues si vendim shumë të rëndësishëm për drejtësinë në Kosovë, pasi që pushteti i kryeministrit Albin Kurti nuk arriti ta kapë edhe Këshillin Prokurorial të Kosovës.

“Siç e dini dje, Gjykata Kushtetuese ka sjellë vendim që ky projektligj është në kundërshtim me Kushtetutën dhe rendin kushtetues dhe është një lajm shumë i mirë për drejtësinë në Kosovë, që pushteti i madhi Albin Kurtit nuk arriti ta vendosë nën kthetra edhe një institucion kaq të rëndësishëm si Këshilli Prokurorial i Kosovës”, tha Tahiri.

“Miratimi i një vendimi të tillë do të ishte përmbysje apo kapje e madhe e fuqishme e KPK-së që sot mund të jetë nga Albin Kurti e nesër nga dikush tjetër”, shtoi ai.

Ai tregon se si GP bashkë me grupet tjera parkamentare e kanë përgaditë lëndën me avokatin Faton Fetahu, të cilin e kishin proceduar në Gjykatën Kushtetuese më 1 korrik të vitit 2022, meqenëse ky projektligj është i paligjshëm dhe antikushtetues, specifikisht në 4 amandamente, në të cilat Ministria e Drejtësisë kishte bërë ndryshime rrënjësore në mandatin dhe përbërjen e KPK-së.

“Gjatë gjithë kësaj kohe i kemi bërë thirrje ministres së drejtësisë dhe kryeministrit ta tërheqin këtë projektligj, për shkak se padyshim se do ta dërgojmë në GJK dhe nuk i përmbysh standardet kushtetuese të republikës e sigurisht që nuk mund të kalojë. Është konflikt i pastër interesi. Mundohet ta arsyetojë këtë është mjerim i madh”, thotë Tahiri.

Policia me informacione rreth protestës së sotme të PSD-së

13:05

Policia e Kosovës në njoftim për media thekson se me qëllim të ruajtjes së rendit dhe qetësisë publike si dhe mbarëvajtjes së protestës së paraparë të mbahet sot më datë 25.03.2023 në orën 14:00 në Prishtinë, ka bërë përgatitjet e nevojshme operacionale policore.

Njoftimi i Policisë vjen pasi ditë më parë Partia Socialdemokrate ka paralajmëruar një protestë për sot për të kundërshtuar marrëveshjen e Ohrit.

“Policia e Kosovës e njeh të drejtën e shprehjes së lirë, pakënaqësive (protestës) si e drejtë ligjore. Lidhur me këtë PK-ja, ka filluar me kohë përgatitjen dhe ndërmarrjen e masave që kanë për qëllim mbarëvajtjen e protestës, ruajtjen e rendit dhe sigurisë publike, ofrimin e sigurisë për qytetarët, mbrojtjen e pronës dhe ofrimin e sigurisë në trafik”, thuhet në njoftim.

Më tej Policia thekson se do të ndërmerr masat e nevojshme preventive, operative policore për të siguruar që mbarëvajtja e protestës të kalojë pa ndonjë incident, që pjesëmarrësit në protestë të shprehin qëllimin e tyre në mënyrë demokratike dhe në suaza ligjore.

“Sipas procedurave të parapara policia do të merr masa dhe do të shtojë aktivitetet operative para, gjatë dhe pas përfundimit të protestës. Me këtë rast fton qytetarët, pjesëmarrësit në protestë që protesta të zhvillohet e qetë duke respektuar ligjet e vendit dhe që kërkesat e tyre t’i shpalosin në mënyrë demokratike e ligjore”, thuhet në njoftim.

Tetë persona helmohen nga dioksidi i karbonit nga zjarri në Pejë, dërgohen në Emergjencë

10:46

Tetë persona kanë kërkuar tretman mjekësor në emergjencën e Spitalit të Pejës, për shkak të zjarrit të madh në depot dhe qendrën tregtare ELKOS Center në Pejë.

Kështu kanë bërë të ditur nga Spitali i Pejës përmes një statusi në rrjetin social në Facebook.

Sipas njoftimit, pacientët janë duke u trajtuar dhe gjendja e tyre është stabile dhe jashtë rrezikut për jetë dhe janë raste kryesisht të helmuar nga tymi.

“Në Spitalin e Përgjithshëm në Pejë deri më tani janë duke u trajtuar 8 pacientë nga rasti i djegies së një objekti në Pejë.

Pacientët janë duke u trajtuar tek Spitali ynë dhe gjendja e tyre është stabile dhe jashtë rrezikut për jetë dhe janë raste kryesisht të helmuar nga tymi”, thuhet në njoftim

Skenderaj, vdes një vajzë derisa ishte në gjumë

08:58

Policia e Kosovës ka njoftuar se mëngjësin e së premtës (dje) ka vdekur një vajzë derisa ishte në gjumë, nga fshati Kostrec i Skenderajt.

Vdekjen në Polici e ka raportuar nëna e viktimës.

PK-ja këtë rast e ka cilësuar “vdekje të dyshimtë”, por s’ka dhënë informacione për moshën e viktimës, transmeton Gazeta10.

 “Një femër kosovare, ka njoftuar  se vajza e saj e cila ka qenë fjetur dyshohet se ka ndërruar jetë. Njësitë relevante dhe ekipi mjekësor kanë dalë në vendin e ngjarjes ku është konstatuar vdekja e viktimës”, thuhet në raport.

Ndërsa me vendim të prokurorit, trupi i pajetë është ndërguar në Institutin e Mjekësisë Ligjore për obduksion. /Gazeta10

Sot protestohet kundër marrëveshjes së Ohrit, kërkohet dorëheqja e Kurtit

08:27

Partia Socialdemokrate do të mbajë sot protestën e paralajmëruar kundër marrëveshjes mes Kosovës dhe Serbisë, të arritur në Ohër më 18 mars.

Siç thuhet në njoftim të PSD-së në këtë protestë do të kërkohet edhe dorëheqja e kryeministrit të Kosovës, Albin Kurti.

Protesta nis në orën 14:00 në sheshin “Zahir Pajaziti”, për të vazhduar para ndërtesës së Qeverisë së Kosovës, ku edhe do të mbahen fjalimet.

PSD vlerëson se kryeministri Kurti s’ka legjitimitet, prandaj duhet të dorëhiqet.

“Rrenat që pushteti i përdorte për ta arsyetuar marrëveshjen i patën këmbët e shkurtra. Propaganda nuk iu eci. Revolta e madhe qytetare është dëshmia për këtë. Tashmë, 1 javë pas dakordimit në Ohër, po e kuptojmë qartë se çka lë të kuptojë Plani Evropian dhe Aneksi i Zbatimit. Në njërën anë, marrëveshja normalizon mosnjohjen në mes të Kosovës dhe Serbisë dhe, me vullnetin politik të Kurtit, Kosova heq dorë nga kërkesa për njohje. Në anën tjetër, Kosova, me vullnetin politik të Kurtit, merr përsipër të krijojë Asociacion njëetnik me autonomi substanciale si formë e pushtetit paralel përballë pushtetit qendror. Marrëveshja është jashtëzakonisht e dëmshme. Prandaj rezistenca duhet të jetë e përbashkët e masive. Nesër, me 25 mars, protestojmë duke kërkuar dorëheqjen e Kurtit. Ky kryeministër nuk ka legjitimitet të nënshkruajë marrëveshje të tillë”, thuhet në deklaratën e PSD-së.

Ish-kryeadministratori i Kosovës: Pala kosovare dhe serbe, të detyruar për zbatimin e marrëveshjes

23:30

Diplomati gjerman, ish-kryeadministratori i Kosovës Joakim Ryker ka folur për marrëveshjen e Ohrit mes Kryeministrit të Kosovës, Albin Kurti dhe Presidentit serb Aleksandar Vuçiq.

Sipas tij, e vetmja gjë që ngelet tashmë është besimi se marrëveshja e firmosur do të zbatohet.

“Po, idealisht një marrëveshje pas Brukselit do të duhej te ishte firmosur; jam dakord me këtë. Gjithsesi, e kemi konfirmimin nga Josep Borell dhe nga lehtësuesi i Bashkimit Europian, që palët janë të zotuara ndaj kësaj marrëveshjeje dhe ndaj zbatimit të saj. Do të thosha që ndërkohë, nëse s’vërtetohet ndryshe, duhet të kemi të gjithë besim në lidhje me hapat e mëtejshëm dhe në lidhje me zbatimin,” – u shpreh Ryker, shkruan Euronews Albanian.

Ai shtoi se bëhet fjalë për një marrëveshje “politikisht detyruese”. /Gazeta10/

Propaganda serbe vazhdon, Jeremiq publikon imazhe të Bagdadit duke mashtruar se është Beogradi në 1999

22:43

Vuk Jeremiq, lideri i Partisë Popullore opozitare dhe ish-ministër i Punëve të Jashtme të Serbisë, ka shpërndarë një lajm të rremë me rastin e 24 vjetorit të fillimit të bombardimeve të NATO-s ndaj RF të Jugosllavisë në vitin 1999.

Jeremiq shkrimit të tij ia ka bashkangjitur një fotografi teksa shihet në flakë kryeqyteti irakian, Bagdadi duke pretenduar se bëhet fjalë për Beogradin.

“Ata që duan të relativizojnë agresionin e NATO-s në vitin 1999 thonë se gjoja është drejtuar kundër regjimit të Sllobodan Millosheviqit, e jo kundër Serbisë dhe popullit të saj. Ai pretendim ra në ujë në vitin 2008, kur ata përkrahën shpalljen e njëanshme të pavarësisë në Prishtinë…”, ka shkruar Jeremiq në Twitter.

Jeremiq pas reagimeve të shumta, duke përfshirë edhe analistin austriak, Florian Bieber ka pranuar se kishte shpërndarë një fotografi të Bagdadit dhe ka kërkuar falje. /Gazeta10/

Krasniqi: PDK-ja mbrojti rendin kushtetues ndaj tentativave të Kurtit për ta shkelur

22:23

Kryetari i Partisë Demokratike të Kosovës, Memli Krasniqi, ka reaguar pasi Gjykata Kushtetuese vendosi në favor të kërkesës së kësaj partie, duke e vlerësuar si jokushtetues Ligjin për Këshillin Prokurorial të Kosovës.

“Partia Demokratike e Kosovës edhe njëherë dëshmoi se ju shërben interesave të qytetarëve e të shtetit tonë, duke mbrojtur rendin kushtetues përkundër tentativave të Qeverisë Kurti për ta shkelur atë”, ka shkruar Krasniqi, në faqen e Facebookut.

“Edhe sot, Gjykata Kushtetuese na dha të drejtë, duke e shpallur si anti-kushtetuese përpjekjen e Kryeministrit Albin Kurti për ta vënë nën kontroll dhe për ta cënuar integritetin dhe profesionalizmin e Këshillit Prokurorial të Kosovës”.

Krasniqi ka theksuar se Kushtetuta, si bazament i parimeve të drejtësisë, nuk mund dhe nuk do të lejojmë kurrë që të shkelet nga pretendimet uzurpuese të pushtetit.

“Ngjashëm si në këtë rast, do ta kundërshtojmë secilën nismë qeveritare që synon t’ia nënshtrojë të drejtën diktatit të një njeriu dhe qëllimeve autoritare të këtij pushteti”. /Gazeta10/

Kurti, ambasadorit Hill: Askush s’duhet të ndihet i turpëruar për bombardimet

21:42

Kryeministri i Kosovës, Albin Kurti, i është përgjigjur ambasadorit amerikan në Serbi, Christopher Hill, që të premten u shpreh se “nganjëherë diplomacia dështon”, për t’u paraprirë ngushëllimeve familjeve serbe që pësuan nga bombardimet e NATO-s.

Në një organizim për nder të 24-vjetorit të ndërhyrjes së NATO-s në Kosovë, Kurti ka thënë se “askush nuk duhet të ndihet i turpshëm apo fajtor në mesin e trupit diplomatik, qofshin amerikan apo evropian apo tjetër, as në Prishtinë e as në Beograd”.

“Vuajtja njerëzore e Kosovës është e vërteta historike e Serbisë. 24 marsi është një ditë e madhe, çdo vit, andaj, të gjithëve dhe për të gjithë: Gëzuar dhe kënaquni!” ka thënë ai, sipas komunikatës së Qeverisë, raporton Koha.net.

Në fjalimin në një ballkon të ndërtesës së Qeverisë, Kurti ka ironizuar me iniciativën e “Ballkanit të Hapur”.

“Ndryshe nga Iniciativa Rajonale e Ballkanit të Hapur, stafi im më pat propozuar Iniciativën e Ballkonit të Hapur me miqtë, të cilën e përqafova me gjithë zemër. Ndaj ju mirëpresim sërish, në nismën më të re: Ballkoni i hapur”, ka thënë ai. /Gazeta10/

LDK kërkon shkarkimin e ministres Haxhiu pas vendimit të Kushtetueses

20:58

Lidhja Demokratike e Kosovës duke komentuar vendimin e Gjykatës Kushtetuese lidhur me Ligjin për Ndryshimin dhe Plotësimin e Ligjit për Këshillin Prokurorial të Kosovës, të cilin e shpalli të pavlefshëm, ka vlerësuar se më e pakta që duhet të ndodh tani është shkarkimi i menjëhershëm i Ministres së Drejtësisë Albulena Haxhiu si shkelëse e Kushtetutës së Republikës së Kosovës.

LDK në komunikatën për media ka theksuar se ky është dështimi i radhës për kapje të shtetit. “Sot Gjykata Kushtetuese e shpalli Aktgjykimin lidhur me vlerësimin e kushtetutshmërisë së Ligjit nr. 08/L-136 për Ndryshimin dhe Plotësimin e Ligjit nr. 06/L-056 për Këshillin Prokurorial të Kosovës. Gjykata Kushtetuese i ka vlerësuar si të pranuara të gjitha pretendimet e ngritura nga Lidhja Demokratike e Kosovës (LDK), se ligji në fjalë në pjesën materiale të saj është kundër kushtetues, rrjedhimisht ai duhet të shpallet i pavlefshëm në tërësinë e tij, thuhet në komunikatën e LDK-së

Tutje në komunikatë thuhet se rrëzimi i këtij ligji është rrëzim i tendencës së pushtetit për të kapur sistemin e drejtësisë. Lidhja Demokratike e Kosovës, vlerëson se më e pakta që duhet të ndodh tani është shkarkimi i menjëhershëm i Ministres së Drejtësisë Albulena Haxhiu si shkelëse e Kushtetutës së Republikës së Kosovës.

“Shkelësit e kushtetutës nuk duhet të kenë vend në institucionet publike, aq më pak në krye të institucionit kryesor të drejtësisë. Lidhja Demokratike e Kosovës ndërsa, gjithmonë do jetë në mbrojtje të Republikës sonë dhe rendit tonë kushtetues; një fushë që ky pushtet duket se nuk e kupton”, thuhet në komunikatë.

Chollet falënderon Kovaçevksin për organizimin e takimit të Ohrit

20:53

Këshilltari i Lartë në Departamentin Amerikan të Shtetit, Derek Chollet, përmes një postimi në Twitter ka njoftuar se ka biseduar sot me kryeministrin e Maqedonisë së Veriut, Dimitar Kovaçevski.

Chollet ka falënderuar Kryeministrin maqedonas për organizimin dhe mikpritjen e tyre, me rastin e takimit për dialog mes kryeministrit Albin Kurti dhe presidentit serb, Aleksandër Vuçiq, në Ohër, me ndërmjetësim të BE-së.

“Telefonatë e shkëlqyer me PM @DKovachevski për të falënderuar përsëri Maqedoninë e Veriut për udhëheqjen dhe mikpritjen e tyre duke pritur Dialogun e Lehtësuar nga BE-ja ndërmjet Serbisë dhe Kosovës”, ka shkruar Chollet.

Chollet dje tha se Kosova tani është më afër se kurrë drejt të ardhmes së saj në BE, pas bisedës telefonike që zhvilloi me kryeministrin Albin Kurti, duke e uruar atë për marrëveshjen e arritur në Ohër për normalizimin e marrëdhënieve mes Kosovës dhe Serbisë. /Gazeta10/

Tahiri: Rrëzimi i Ligjit për KPK-në, lajm shumë i mirë për drejtësinë

20:05

Shefi i Grupit Parlamentar të Partisë Demokratike të Kosovës, Abelard Tahiri, ka thënë se rrëzimi i Ligjit për Këshillin Prokurorial të Kosovës nga Gjykata Kushtetuese është lajm shumë i mirë për drejtësinë.

Gjykata Kushtetuese të premten e ka shpallur të pavlefshëm Ligjin për KPK-në, pas kërkesës për vlerësim të kushtetutshmërisë së këtij ligji nga deputetët e Partisë Demokratike të Kosovës dhe Lidhjes Demokratike të Kosovës, vitin e shkuar.

Tahiri ka thënë për KOHËN se vendimi i Kushtetueses është lajm i mirë për Kosovën që sistemi i drejtësisë nuk po arrin të vendoset nën, siç thotë ai, kthetrat e pushtetit të Albin Kurtit.

“Sot jemi të lumtur që Kushtetuesja na ka dhënë të drejtë mbi ato që kemi thënë për Ligjin për KPK-në. Është lajm i mirë për Kosovën që përfundimisht Prokurori i Shtetit nuk po arrin të vendoset nën kthetrat e pushtetit të Kurtit. Ky është lajm shumë i mirë për drejtësinë”, ka thënë ai.

Ish-ministri i Drejtësisë nën Qeverinë Haradinaj ka thënë se ky ëigj ka synuar që ta vë sistemin e drejtësisë nën kthetrat politike. Ka theksuar se e kanë paralajmëruar edhe ministren Albulena Haxhiu, por edhe kryeministrin Albin Kurti se një ligj i tillë nuk mund të kalojë.

“Ne si Grup Parlamentar i PDK-së, që në momentin kur ka ardhur Ligji për KPK-në në debatin parlamentar që kemi pas, kemi thënë se ky ligj është në shpërputhje me rendin tonë kushtetues dhe si i tillë nuk mund të kalojë. Ne i kemi propozuar Qeverisë që ta tërheqë mbrapa sepse nuk mund të kalojë një projektligj i tillë, i cili zyrën e Kryeprokurorit e vë nën kthetrat e politikës apo më mirë të themi nën kthetrat e Albin Kurtit. I kemi dhënë të gjitha argumentet tona duke mos dashur të kemi betejë politike për një çështje kaq të rëndësishme për drejtësinë, mirëpo këto argumente nuk janë marrë parasysh as nga ministrja, as nga kryeministri dhe ata kanë proceduar projektligjin që të votohet në të dyja leximet. Në afatin kohor e kemi proceduar në Kushtetuese me argumentet tona, të cilat e bëjnë si ligj në shpërputhje me Kushtetutën”, ka thënë Tahiri.

KOHA ka provuar të kontaktojë edhe me ministren e Drejtësisë, Albulena Haxhiu, por telefoni i saj ka qenë i paqasshëm.

Shtetet e QUINT-it nuk kërkojnë më shtyrje të zgjedhjeve në veri

18:47

Ambasadat e Francës, Gjermanisë, Italisë, Mbretërisë së Bashkuar dhe Shteteve të Bashkuara të Amerikës në Kosovë kanë lëshuar një deklaratë përmes së cilës kanë shprehur keqardhje për vendimin e Listës Serbe që të mos marrin pjesë në zgjedhjet lokale në 4 komunat veriore më 23 prill, raporton Gazeta10.

Shtetet e QUINT-it kanë thënë se zgjedhjet janë themel i demokracisë dhe se është thelbësore që të sigurohet që ato të mbahen në mënyrë paqësore dhe të rregullt.

“Na vjen keq që Lista Serbe nuk e shfrytëzoi të drejtën demokratike për të marrë pjesë në këto zgjedhje. Zgjedhjet janë themeli i demokracisë. Është thelbësore të sigurohet që ato të mbahen në mënyrë paqësore dhe të rregullt. Presim që autoritetet përkatëse të veprojnë me profesionalizëm. U bëjmë thirrje të gjitha palëve të ushtrojnë përmbajtje dhe të shmangin dhunën, e cila mund të prishë zgjedhjet”, thuhet në deklaraten e shteteve të QUINT-it. /Gazeta10/

LAJMET KRYESORE
Kina akuzon Avdullah Hotin dhe disa deputetë se “ia shkelën sovranitetin territorial”
Pas Haki Abazit, nga nesër një tjetër deputet largohet nga Vetëvendosje
Madhështore, Jakaj sypatrembur mposht serbin, Nikolic
Agim Ademit i përkeqësohet gjendja pas ndalimit policor (Video)
U bë virale në rrjetet sociale, flet zëdhënësja e “KRU Prishtina”, e cila me laps e letër ftoi konsumatorët ta shkarkojnë aplikacionin
Turqia goditet sërish nga tërmeti