Trajneri i Ballkanit, Ilir Daja dhe futbollisti, Nazmi Gripshi, kanë dalë në konferencë për media para ndeshjes kundër Klaksvikut, përballje kjo e cila zhvillohet në kuadër të rrethit të tretë kualifikues të Ligës së Konferencës.

Daja, është shprehur se skuadra e tij është gati për këtë ballafaqim dhe kërkon lojë të disiplinuar nga lojtarët e tij.

“Në raundin e tretë nuk ka ndeshje të lehta, sepse ekipet apo ekipi që e kemi përball është i disiplinuar. Mendoj se duhet të jemi të përqendruar dhe ekuilibruar pasi gjithçka mund të vendoset nga detajet, ashtu siç na ndodhi me Zhalgirisin. Duhet të jemi cinikë, të shfrytëzojmë rastet dhe të arrijmë rezultat pozitiv”, tha Daja. “Duhet të jemi të kujdesshëm dhe nuk mund të them se jemi ne apo kundërshtari favorit. Ekipi që do të ketë përqendrim maksimal do të shkon drejt objektivit. Shpresojmë të kemi fatin dhe të marrim fitore.”, deklaroi Ilir Daja.

Ndërkohë sulmuesi Nazmi Gripshi, deklaroi se ekipi do të japë maksimumin në këtë ndeshje.

“Mendoj se jemi gati dhe kemi pasur kohë të mjaftueshme të përgatitemi. Po ashtu, kemi disa ndeshje që po i luajmë dhe mund të them se të gjithë jemi optimistë për këtë ndeshje. Do ta japim maksimumin dhe besoj që do të bëjmë një paraqitje dinjitoze, pasi vetëm Ballkani është tani përfaqësues i Kosovës në Evropë. Duhet t’i shfrytëzojmë rastet që do t’i kemi për ta fituar këtë ndeshje”, ka thënë Gripshi.

Ballkani do të ndeshet me Klaksvikun të enjten më 4 gusht, në stadiumin “Fadil Vokrri, me fillim nga ora 20:00.