Situata e sigurisë në Kosovë po përkeqësohet dukshëm dhe NATO po e shton praninë e saj në pranverë, edhe me ndihmën e Bundeswehr-it. Gjeneral brigade i Bundeswehr-it gjerman, Ralf Hammerstein shpjegon se si nacionalistët po mobilizohen në Serbi – dhe pse situata e paqëndrueshme në Ballkanin Perëndimor po i shkon për shtati Putinit të Rusisë.

Ai ka thënë për Die Welt se si nacionalistët po mobilizohen në Serbi – dhe pse situata e paqëndrueshme në Ballkanin Perëndimor po plotëson dëshirat e Rusisë së drejtuar nga Vladimir Putin.

Hammerstein ka thënë se normalizimi i raporteve Kosovë-Serbi nuk po shkon siç duhet.

 “Para së gjithash, duhet thënë se KFOR-i është reduktuar nga 50,000 në një prani minimale prej 4,500 trupash. Por është e vërtetë që normalizimi mes Beogradit dhe Prishtinës nuk po përparon siç shpresonim të gjithë. Është një detyrë shumë brezash”, u shpreh ai.

Gjenerali gjerman tha se për sa kohë që nacionalizmi mbizotëron në Ballkanin Perëndimor, asnjë kufi nuk do të mund të ekzistojë me mirëbesim.

“Janë të gjitha shtete të reja këtu në Ballkanin Perëndimor dhe pothuajse të gjitha qeveritë po ndjekin një kurs nacionalist. Nëse shikoni prapa në historinë e konfliktit jugosllav, do të shihni se ka autorë dhe viktima nga të gjitha anët. Ka kufij etnikë që janë tërhequr.

Ky etno-nacionalizëm, megjithatë, është e kundërta e pajtimit. Për sa kohë që përmenden ide të tilla si Serbia e Madhe apo Shqipëria e Madhe – dhe këto nuk janë narrativa të asnjë ekstremisti – asnjë kufi nuk do të mund të ekzistojë me mirëbesim”, u shpeh ai.

Hammerstein shton se Prishtina dhe Beogradi po ndjekin një politikë të sovranitetit dhe reciprocitetit maksimal, e cila çon në konflikte të tilla sikurse mosmarrëveshja e targave në nëntor të vitit të kaluar.

“Prishtina dhe Beogradi ndjekin një politikë të sovranitetit dhe reciprocitetit maksimal. Kjo pastaj çon në konflikte të tilla si mosmarrëveshja e targave në nëntor të vitit të kaluar: Beogradi ndalon hyrjen e targave kosovare dhe qeveria e re në Prishtinë ka reaguar në përputhje me rrethanat për të mbështetur sovranitetin e saj. Kjo pikë grindjeje në dukje teknokratike çoi në tërheqjen e zyrtarëve serbë të Kosovës nga të gjitha institucionet dhe në zgjedhje të reja në veri të Kosovës, të cilat u bojkotuan nga popullata serbe e Kosovës.

E gjithë kjo çoi në trazira të dhunshme në maj të këtij viti – dhe më në fund në një përleshje ndërmjet ushtarëve të KFOR-it dhe demonstruesve serbë, në të cilën u plagosën më shumë se 90 ushtarë të KFOR-it, disa prej tyre në gjendje të rëndë”, tha ai.

Duke folur për sulmin e 24 shtatorit dhe kërcënimin e Serbisë me rritjen e ushtrisë përgjatë kufirit me Kosovës, gjenerali gjerman thotë se ky grupi terrorist mund të ketë pasur bashkëpunim me Serbinë.

“Në çdo rast, duke pasur parasysh madhësinë e supozuar të grupit dhe pajisjet dhe armatimin e sekuestruar, ata ishin me origjinë serbe. Mund të supozohet se ka pasur të paktën njëfarë bashkëpunimi nga ana e Serbisë

Forcat serbe kanë dislokuar tre brigada përgjatë vijës kufitare serbo-kosovare – jo drejtpërdrejt, por afër. Më pas, në shtator, vumë re një grumbullim prej rreth 4,000 trupash që u transferuan nga këto brigada në bazat e operacioneve më përpara.

700 ishin forca rezervë që Komandanti Suprem i NATO-s për Kosovën dhe Bosnjën i mbajti në gatishmëri gjatë gjithë kohës. Forcat kryesisht britanike janë vendosur për të forcuar praninë përgjatë kufirit. Por ata nuk janë grumbullimi i përhershëm i trupave që ne kemi nevojë për situatën aktuale. Tani ka konsiderata konkrete se si duhet bërë kjo. Gjermania ka njoftuar tashmë se do të dërgojë një kompani këmbësorie në pranverë. NATO e ka pranuar me mirënjohje këtë”, shprehet ai.