Katër rajone gjermane pranë kufirit kanë paraqitur ankesë zyrtare, duke paralajmëruar se zgjerimi i pistave do të rrisë ndotjen akustike mbi territorin e tyre.

Katër rajone gjermane kufitare kanë kundërshtuar planet për zgjerimin e dy pistave të Aeroportit të Cyrihut, i cili ndodhet rreth 20 kilometra nga kufiri me Gjermaninë, transmeton albinfo.ch.

Të shqetësuara për rritjen e ndotjes nga zhurma, autoritetet e rajoneve Waldshut, Lörrach, Constance dhe Black Forest-Baar kanë paraqitur një ankesë pranë Zyrës Federale të Aviacionit Civil të Zvicrës (FOCA).

Në deklaratën e përbashkët të publikuar të hënën, këto katër rajone kundërshtojnë kërkesat për miratimin e zgjerimit të pistave 28 dhe 32 të Aeroportit të Cyrihut.

“Ne kundërshtojmë fuqishëm zgjerimin e pistave 32 dhe 28 nëse kjo do të thotë që hapësira ajrore gjermane të përdoret edhe më shumë se deri tani nga avionët e mëdhenj, të cilët shkaktojnë nivele të larta zhurme”, thuhet në deklaratën e tyre.