Amerikanja Christa Pike (50), e dënuar me vdekje për një vrasje të kryer kur ishte adoleshente, mbijetoi pas një tentative të dështuar për ekzekutim me injeksion vdekjeprurës dhe tani, sipas avokatit të saj, ka filluar të flasë sërish.

Javën e kaluar, në një burg të Tenesisë, Pike mori dy doza pentobarbitali që supozohej të ishin vdekjeprurëse. Megjithatë, ajo nuk vdiq.

Pas ekzekutimit të dështuar, ajo u dërgua me urgjencë në spital, ku qëndroi në gjendje kritike për disa ditë – pa ndjenja dhe e lidhur me aparatin e frymëmarrjes artificiale. Në një moment, familja dhe avokatët e saj ishin të bindur se kishte ndodhur më e keqja.

“Të hënën në mbrëmje, kuptuam se Christa kishte pësuar vdekje cerebrale dhe se aparatet që e mbanin në jetë do të fikeshin të nesërmen,” tha avokati i saj, Randy Spivey.

Megjithatë, ndodhi një kthesë e jashtëzakonshme.

“Të martën, për habinë e të gjithëve… Christa u zgjua dhe filloi të fliste,” tha Spivey.

Pike tani është zgjuar dhe mund të flasë deri diku, edhe pse nuk mund të gëlltisë apo të lëvizë krahët. Krahët dhe duart e saj janë ënjtur rëndë dhe mjekët ende nuk e dinë nëse – apo deri në çfarë mase – ajo do të rifitojë funksionin e tyre.

“Mendoj se ajo aktualisht është e zemëruar dhe e hutuar për gjithçka që ka ndodhur. Ajo është shumë e vetëdijshme për atë që i është bërë – të paktën deri në njëfarë mase,” tha Spivey. Ekipi i saj ligjor deklaron se Pike vazhdon të qëndrojë e shtruar në spital me pranga, pavarësisht kërkesave të stafit mjekësor për t’i hequr ato.

“Stafi mjekësor kërkoi që prangat të hiqeshin, por kërkesa e tyre u refuzua,” tha avokati Luke Ihnen gjatë një seance gjyqësore.

Anesteziologu Joel Zivot, i angazhuar nga avokatët si dëshmitar ekspert para ekzekutimit të planifikuar, deklaroi se Pike nuk është më e lidhur me aparatin e frymëmarrjes artificiale. Sipas tij, ka shumë të ngjarë që ajo të mos ketë asnjë kujtim nga vetë tentativa e ekzekutimit. Ajo e di emrin e saj, por beson se aktualisht jemi në muajin shtator.

“Duhet ta pyesim veten se sa vuajtje mjaftojnë. Ne vazhdojmë t’i bëjmë thirrje guvernatorit të Tenesisë, Bill Lee, që ta shndërrojë dënimin e saj me vdekje në burgim të përjetshëm,” tha Spivey. Gjykata urdhëron ruajtjen e të gjitha provave

Ndërkohë, gjykata ka urdhëruar autoritetet e burgut të ruajnë të gjitha provat që lidhen me ekzekutimin e dështuar, përfshirë materialet mjekësore, mbetjet dhe regjistrimet audio e video. Rasti i Christa Pike-ut ka rindezur debatin mbi dënimin me vdekje në Shtetet e Bashkuara.

Guvernatori i Tenesisë, Bill Lee, ka pezulluar përkohësisht ekzekutimet në shtet deri në përfundimin e një hetimi të pavarur, ndërsa kreu i Departamentit të Korrigjimit të shtetit ka dhënë dorëheqjen.

Departamenti i Korrigjimit i Tenesisë deklaroi se procedura u krye në përputhje me protokollet e vendosura. Rasti i parë i njohur i mbijetesës pas injeksionit vdekjeprurës

Qendra e Informacionit për Dënimin me Vdekje njoftoi se Pike është e burgosura e parë e njohur që ka mbijetuar pasi ka marrë doza vdekjeprurëse të barnave të destinuara për ekzekutim.

Pike ishte 18 vjeçe kur ajo dhe i dashuri i saj i asaj kohe rrahën dhe vranë 19-vjeçaren Colleen Slemmer në një kamp trajnimi profesional. Sipas Qendrës së Informacionit për Dënimin me Vdekje, Pike pritej të bëhej gruaja e parë që ekzekutohej në shtetin e Tenesisë pas më shumë se 200 vitesh.

Duke përjashtuar përpjekjen e dështuar për të ekzekutuar Pike-un, këtë vit në SHBA janë kryer 29 ekzekutime, të gjitha përmes injeksionit vdekjeprurës.

Dënimi me vdekje është hequr në 23 nga 50 shtetet amerikane, ndërsa Kalifornia, Oregoni dhe Pensilvania kanë vendosur një moratorium për ekzekutimet.

Burri ekzekutohet në Teksas vetëm shtatë ditë më vonë

Vetëm shtatë ditë pas ekzekutimit të dështuar të Pike-ut, shteti i Teksasit kreu ekzekutimin e 46-vjeçarit Jamaal Howard, gjithashtu përmes injeksionit vdekjeprurës.

Howard ishte dënuar me vdekje për vrasjen e një punonjësi dyqani gjatë një grabitjeje në vitin 2000.

Avokatët e tij u përpoqën të shtynin ekzekutimin duke iu referuar rastit të Christa Pike-ut, por Howard u shpall i vdekur në orën 20:03 me kohën lokale. Në deklaratën e tij të fundit para ekzekutimit, ai tha:

“Më vjen keq për atë që ndodhi. Shpresoj se një ditë do të mund të më falni.” SHBA-ja po përgatitet gjithashtu të ekzekutojë ushtarë përmes skuadrës së pushkatimit.

Dënimi me vdekje në SHBA është sërish në qendër të vëmendjes për shkak të rastit të Nidal Hasanit, një ish-psikiatër ushtarak i cili në vitin 2009 vrau 13 persona dhe plagosi më shumë se dy duzina të tjerë në një sulm në bazën ushtarake Fort Hood në Teksas.

Pentagoni njoftoi se presidenti Donald Trump e kishte miratuar ekzekutimin e tij.

Ekzekutimi i Hasanit me skuadër pushkatimi është planifikuar për më 3 dhjetor; ky do të ishte ekzekutimi i parë i kryer nga ushtria amerikane në këtë mënyrë që nga viti 1961.