Kandidati për kryeministër nga radhët e PDK’së, Bedri Hamza, ka thënë se si kryeministër i ardhshëm do të punojë në drejtim të asaj që çdo grua në Kosovë të ndjehet e mbështetur dhe e sigurt.

Hamza këtë e ka thënë pasi u mblodh në Mitrovicë “për të treguar që barazia gjinore nuk është vetëm çështje e grave, por e krejt shoqërisë”.

“Gratë janë udhëheqëse, profesioniste dhe biznesmene të jashtëzakonshme. Nga përkushtimi si amvise e deri te ngritja në karrierë, gratë do ta kenë mbështetjen e pakursyer, mundësitë që ju duhen dhe respektin që e meritojnë”.

Si kryeministër i ardhshëm, si baba i dy vajzave, si bashkëshort i një zonje, si djalë i një nëne dhe si vëlla i 4 motrave, ju premtoj se do të punoj dhe përkushtohem që çdo grua në Kosovë të ndjehet e mbështetur dhe e sigurt”, tha tutje ai.

Hamza ka thënë se barazia gjinore nuk është vetëm drejtësi, por është domosdoshmëri.

“Unë sot qëndroj këtu për të siguruar që asnjë vajzë, asnjë grua, nuk duhet të pengohet më. Gratë do të kenë vendin që meritojnë në politikë, në biznes dhe në çdo segment të jetës publike. Gratë do të mbështeten për të marrë poste drejtuese dhe për t’u bërë pjesë e vendimmarrjes. Kemi program të mirë, i cili do të jetë mbështetës për gratë”, ka thënë Hamza.

Ai u ka premtuar të gjitha çifteve të reja dhe nënave të reja, të cilat nuk kanë mundësi t’i dërgojnë fëmijët e tyre në çerdhet publike dhe janë të detyruar t’i regjistrojnë në çerdhet private, do t’ju ndahen nga 100 euro si subvencione mujore.

“Nuk do të ngelet vajzë që dëshiron të studiojë, që për shkak të kufizimeve financiare nuk do të ketë mundësi me u shkollu, sepse ne do të krijojmë Fondin për Bursa dhe ai do të jetë 25 milionë çdo vit”, ka thënë Hamza.