Kryetari i Aleancës për Ardhmërinë e Kosovës, Ramush Haradinaj, ka reaguar pas zhvillimeve në veri ku ka shprehur përkrahjen e reciprocitetit me Serbinë dhe ka ftuar qytetarët për ruajtjen e qetësisë, raporton Gazeta10.

Haradinaj ka thënë se vendosja e reciprocitetit ka bazë legale vendore dhe ndërkombëtare dhe se i njejti është i drejtë.

Tutje, Haradinaj, ka thënë se mbështet institucionet e Kosovës në zbatimin e këtij vendimit.

I pari i AAK-së ka ftuar qytetarët serb ta ruajnë qetësinë dhe ta respektojnë rendin dhe ligjin.

Këtu keni statusin e tij të plotë:

“Të dashur qytetarë të Kosovës,

Vendimi për vendosjen e reciprocitetit me Serbinë është i drejtë dhe i ligjshëm edhe në bazë të ligjeve vendore, por edhe atyre ndërkombëtare.

Mbështesim institucionet e vendit, organet e rendit dhe sigurisë, për zbatimin e këtij vendimi të drejtë e të ligjshëm.

Bëjmë thirrje që qytetarët serb në veri të vendit, të përmbahen dhe të ruajnë qetësinë, rendin e ligjin”, ka shkruar Haradinaj në llogarinë e tij në Facebook.

Përndryshe, tensionet e fundit në veri ku qytetarët serb atje kanë filluar bllokimin e rrugëve me kaminonë po vijnë pas vendimit të Qeverisë së Kosovës për vendosjen e reciprocitetit me Serbinë në targa dhe letërnjoftime, / Gazeta10