Kontrollin thelbësor mbi Rripin e Gazës vazhdon ta ushtrojë Hamasi edhe pas tre vitesh luftë, duke përfituar miliona dollarë në ditë përmes taksimit të mallrave që hyjnë në enklavë dhe shitjes në tregun e zi, me çmime të jashtëzakonshme, të ndihmave humanitare të vjedhura, sipas ish-shefes së kërkimeve të Shin Bet, Naomi Neuman.

“Gjithçka që hyn në Rripin e Gazës bëhet burim të ardhurash për Hamasin”, theksoi Neuman për transmetuesin publik izraelit, “Kan”, duke shtuar se organizata e përdor fuqinë e saj ekonomike për të krijuar varësi dhe për të vendosur në heshtje rendin përmes një sistemi të decentralizuar qeverisjeje.

Ish-zyrtarja e Shin Bet vlerëson se të ardhurat ditore të organizatës variojnë nga 2 deri në 5 milionë dollarë, gjë që e ndihmon atë të ruajë ndikimin mbi popullsinë dhe të financojë aktivitetet e saj.

Neuman theksoi se plani i presidentit të SHBA-së, Donald Trump, për Gazën duhet të ecë përpara, por vuri në dukje se si Izraeli, ashtu edhe Hamasi po e pengojnë atë. “Hamasi thotë se Izraeli duhet të tërhiqet fillimisht, ndërsa Izraeli kërkon që Hamasi të çarmatoset”, tha ajo dhe shtoi: “Komiteti Kombëtar për Administrimin e Gazës dhe Forca Ndërkombëtare e Stabilizimit duhet të hyjnë në Rripin e Gazës, në mënyrë që Hamasi të humbasë fuqinë e tij. Autoriteti Palestinez duhet përfundimisht të zëvendësojë Hamasin si organ qeverisës i Gazës.”

Netanyahu nuk është “partner bashkëpunues”

Vështirësitë që Benjamin Netanyahu po krijon në zbatimin e planit të Trump për Gazën i theksoi edhe një zyrtar i lartë amerikan për Washington Post, duke e cilësuar kryeministrin izraelit si “partner jo bashkëpunues”.

“Ai ka ndërmarrë një sërë veprimesh që e përkeqësojnë situatën”, pretendoi zyrtari, duke iu referuar përparimit të ngadaltë të Forcave të Mbrojtjes së Izraelit (IDF) në Gaza, i cili ka bërë që ato të marrin nën kontroll edhe 10% të Rripit, përtej territoreve të parashikuara në marrëveshjen e armëpushimit të vitit 2025 me Hamasin.

Plani i Trumpit në thelb ka ngecur, mes mosmarrëveshjeve ndërmjet Komitetit, Hamasit dhe Izraelit lidhur me kushtet dhe rendin e veprimeve për çarmatosjen e organizatës dhe tërheqjen e forcave izraelite. Udhëheqësit izraelitë kanë theksuar vazhdimisht se asnjë rindërtim i Gazës nuk mund të fillojë përpara çarmatosjes së organizatës.