Kalimi përmes ngushticës së Hormuzit pothuajse është paralizuar të premten, pasi edhe dy anije të tjera u sulmuan në këtë zonë, ndërsa Shtetet e Bashkuara deklaruan se mund ta mbajnë për një kohë të pacaktuar bllokadën detare ndaj Iranit.

Një burim i lartë iranian tha të mërkurën se nuk kishte pasur përparim në bisedimet për të ndërtuar mbi marrëveshjen e qershorit, e cila synonte t’i jepte fund luftës.

Pas dështimit të armëpushimit të parashikuar në marrëveshjen e qershorit, Irani ka rifilluar sulmet ndaj anijeve që i akuzon se po përpiqen të kalojnë nëpër ngushticë pa lejen e tij.

Kompania Kombëtare e Naftës e Abu Dhabit në Emiratet e Bashkuara Arabe tha se dy nga anijet e saj u sulmuan të enjten në mbrëmje, teksa po kalonin përmes ngushticës.

Qeveria e Emirateve të Bashkuara Arabe fajësoi Iranin për sulmet, ndërsa Teherani nuk ka bërë menjëherë ndonjë koment, transmeton Klankosova.tv.

Sipas të dhënave të kompanisë së gjurmimit të anijeve Kpler, të premten vetëm dy anije kaluan nëpër këtë rrugë të ngushtë detare: një anije që transportonte drithëra dhe po hynte në ujërat iraniane, si dhe një anije e zbrazët për transport të mallrave të thata, që po lëvizte në drejtim të kundërt.

Të dhënat treguan gjithashtu se një tjetër cisternë e zbrazët, e cila transporton produkte të gazit të lëngshëm të naftës, po hynte në Gjirin Persik përmes ngushticës.

Të premten nuk u regjistrua asnjë transport i naftës së papërpunuar përmes ngushticës së Hormuzit.