Ambasada e Republikës së Kosovës në Shkup ka njoftuar se regjimi i ri kufitar në mes të Kosovës dhe Maqedonisë së Veriut do të operacionalizohet në mesin e muajit prill të këtij viti.

Sipas një postimi në Facebook, bëhet e ditur se prolongimi disa ditor është bërë me qëllim të përgatitjeve finale teknike e logjistike të ekipeve të cilat janë duke punuar intensivisht në zbatimin e kësaj marrëveshjeje të rëndësishme ndërshtetërore.

“Rikujtojmë se regjimi i ri kufitar do të jetë sipas modelit “hyrje-hyrje” ku kontrollet do të realizohen vetëm në hyrje nga policia respektive e shtetit kurse policët do të punojnë në një objekt të përbashkët. Zbatimi i saj do të jetësohet paralelisht në pikat kufitare Hani i Elezit/Bllacë dhe Glloboqicë/Jazhincë”, thuhet tutje në njoftim.

Ky model pritet që të zvogëlojë pritjet dhe është në funksion të lehtësimit të qarkullimit të qytetarëve të dy shteteve të cilët qarkullojnë çdo herë e më shumë në dy drejtimet.