Kryeministri i Republikës së Kosovës, Albin Kurti, i shoqëruar nga zëvendësministri i Kulturës, Rinisë dhe Sportit, Sylejman Elshani dhe deputeti i Kuvendit të Republikës së Kosovës, Erxhan Galushi, priti në takim Zeljko Jovanoviq, Drejtor i organizatës Open Society Roma për Evropë, në kuadër të Open Society Foundations.

Kumtesa për media thekson se duke folur për avancimin e të drejtave të të gjitha komuniteteve në Republikën e Kosovës, kryeministri Kurti njoftoi Jovanoviq për nismat e Qeverisë por edhe rolin aktiv të saj në fuqizimin e komunitetit rom në Republikën e Kosovës.

“Jovanoviq ndërkaq ndau me Kryeministrin detajet e projekteve të menaxhuara nga Fondacioni, e që kanë për qëllim zhvillimin ekonomik, fuqizimin politik por edhe atë edukativ e kulturor të komunitetit rom”, thuhet në njoftim.

Në kuadër të diskutimit, janë theksuar masat e nevojshme edhe në kuadër të Planit të Rritjes që stimulojnë punësimin, themelimin e bizneseve mikro, të vogla e të mesme si dhe trajnimet profesionale të këtij komuniteti në Republikën e Kosovës.

“Në fund u theksua rëndësia e pjesëmarrjes së komunitetit rom në Regjistrimin e Popullsisë që fillon në prill, proces ky thelbësor për planifikimin e duhur të politikave për të gjitha komunitetet që jetojnë në Kosovë”, përfundon kumtesa nga qeveria.