Kryeministri në detyrë Albin Kurti ka përkujtuar sot 31 civilët e vrarë në Masakra e Nabërgjanit, duke theksuar nevojën për drejtësi dhe mos-harrim të krimeve të luftës.

Në një postim publik, Kurti kujtoi burrat, gratë dhe fëmijët – të moshave nga 13 deri në 95 vjeç – të cilët u vranë në vitin 1999, duke i cilësuar si viktima të pafajshme të një krimi të kryer nga aparati shtetëror ushtarak dhe policor i regjimit të Sllobodan Millosheviqit.

Ai theksoi se, ndonëse qëllimi ishte shfarosja e popullit shqiptar, ky plan dështoi. “Populli ynë mbijetoi. Ne jemi këtu, të lirë e fitimtar,” u shpreh Kurti, duke shtuar se Kosova, me mbështetjen e aleatëve perëndimorë, arriti çlirimin dhe sot po zhvillohet në paqe.

Megjithatë, kryeministri në detyrë nënvizoi se pa drejtësi nuk mund të ketë paqe të plotë. Ai bëri thirrje ndaj Prokurorisë së Shtetit, veçanërisht Prokurorisë Speciale, që të intensifikojë veprimet për hetimin dhe ndjekjen penale të krimeve të luftës, duke kërkuar që autorët të përballen me drejtësinë, edhe në mungesë nëse është e nevojshme.

Kurti e mbylli mesazhin duke theksuar rëndësinë e kujtesës kolektive dhe zotimin që krime të tilla të mos përsëriten kurrë, ndërsa u shpreh: “Lavdi të gjithë dëshmorëve dhe martirëve të kombit tonë. I përjetshëm qoftë kujtimi për ta.”