Raporti: Arbresha Berisha / Kanal10

Kuvendi i Kosovës as gjatë këtij viti nuk ka arritur të përmbush agjendën legjislative, derisa në mungesë të kuorimit në seanca, disa projektligje do të barten për shqyrtim gjatë vitit 2023. Puna e Kuvendit të Kosovës edhe gjatë këtij viti u karakterizua me përplasje, debate të ashpra e fyerje.

Fyerje, fishkëllima, përplasje, goditje tavolinash, akuza e kundër akuza.

Të gjitha këto, karakterizojnë më së miri punën e Kuvendit të Kosovës, edhe gjatë vitit 2022.

Debatet me tone të larta mes mazhorancës e opozitës, nuk munguan pothuajse në asnjë nga seancat e kuvendit.

E nuk munguan as situata të tilla.

Të pakta nuk janë as rastet kur debatet eskaluan deri në fyerje.

Ndërsa, përplasjeve nuk i shpëtoi as kryeministri Albin Kurti.

Derisa opozita kritikoi ekzekutivin për qasjen në dialog, për politikën e brendshme e të jashtme, situatën në veri, grevat në arsim, gjendjen në shëndetësi e fushat tjera, ajo që u dëgjua më së shpeshti nga kryeministri Kurti, ishte se fajtor për dështimet ishin  qeveritë e kaluara e jo ai.

Ndërsa, nga opozita e quajtën atë dezertorë e magjistar.

Debate të ashpra pati edhe mes ministrave e opozitës.

Nga këto të fundit kërkuan shkarkimin e ministrit të Financave, Hekuran Murati, ministres së Punëve të Jashtme, Donika Gërvalla, asaj të Industrisë, Rozeta Hajdari e ministres së Ekonomisë, Artane Rizvanolli.

Për shkak të mospajtimeve, të zakonshme gjatë këtij viti u bënë rastet kur përfaqësuesit e popullit lëshuan seancat e Kuvendit.

Për vetëm gjashtë muajt e parë të vitit 2022, nga 45 seanca të Kuvendit, 23 prej tyre dështuan të mbahen në mungesë të kuorumit.

Në mungesë të deputetëve, numër i madh i projektligjeve u bartën nga një seancë në tjetrën.

Për dështimin e seancave, pozita e opozita fajin i’a lanë njëra-tjetrës.

Ndërsa, ashtu siç e lanë në verë, deputetët iu rikthyen punimeve në sesionin vjeshtor me përpasje, kritika e akuza.

Mirëpo, pati edhe momente, të cilat mund të kenë qenë të çuditshme për qytetarët.

Edhe pse të rralla, nuk munguan as rastet kur pushteti e opozita u pajtuan për kalimin e disa projektligjeve.

Përkundër mospajtimeve, ato u bënë bashkë për ratifikikimin e marrëveshjes me MCC-në, marrëveshjen për pjesëmarrje të Kosovës në “Fiscalis”, e Marrëveshjen e Bashkëfinancimit për Projektin Parku i Inovacionit dhe Trajnimit në Prizren.

Ndërkaq, edhe këtë vit, për disponimin e përfaqësuesve të popullit, u kujdes kryeparlamentari Glauk Konjufca.