Ish këshilltari i presidentit amerikan, Donald Trump, John Bolton, ka thënë se nuk po sheh shenja që mund të ketë një marrëveshje Kosovë-Serbi, raporton Gazeta10.

Bolton ka thënë se një zgjidhje mes Kosovës dhe Serbisë as që po shihet në horizont siç ishte më pare.

“Për momentin nuk shoh ndonjë zgjidhje në horizont, siç ishte më parë. Kur isha këshilltar për sigurinë kombëtare në administratën e Presidentit Trump, kisha njëfarë përfshirje në zgjidhjen e kësaj çështjeje. Kishte njerëz që u përpoqën të bënin atë që mundën për të arritur një marrëveshje”, ka thënë Bolton.

Tutje, ai ka thënë se marrëveshja Kosovë-Serbi nuk është vetëm një punë mes Kosovës dhe Serbisë por ajo implikon edhe interesa të palëve të treta dhe se kjo e vështirëson arritjen e saj.

“Nëse Serbia dhe Kosova mund të arrijnë një marrëveshje, me gjithë vështirësitë e brendshme, dhe të justifikojnë një marrëveshje të tillë, mendoj se në atë rast faktorët e jashtëm nuk duhet të ndërhyjnë dhe të thonë se zgjidhja nuk është e pranueshme për ta, sepse mund të ketë pasoja diku tjetër. . Stabiliteti nuk mund të arrihet nëse të dyja palët nuk janë të gatshme të arrijnë një marrëveshje, e cila nuk është përdorur më parë”, ka deklaruar ai. / Gazeta10