Veç pak orë para mbledhjes së përbashkët të dy Qeverive, asaj të Kosovës dhe asaj të Shqipërisë, kryeministri shqiptar Edi Rama doli në një konferencë të jashtëzakonshme.

Reagimet në Kosovë ishin të mëdha. Qeveria e quajti vendim të njëanshëm e opozita e cilësoi si alarmuese.

Kreu i LDK-së, Lumir Abdixhiku, ka thënë se ky është lajm i keq për shqiptarët, në Kosovë, në Shqipëri, në Luginë, Maqedoni e Mal të Zi.

Ai tha se, Kosova fatkeqësisht vazhdon të rrugëtojë drejt izolimit e vetmisë.

“Këtë herë, si asnjëherë, mbetëm dhe pa Shqipërinë. Po mbesim dhe do të mbesim pa secilin aleat që qëndronte me ne në çdo etapë të vështirë”.

“Kjo s’është Kosova që e kishim menduar ndonjëherë”, u shpreh ai.

Sipas tij, rrugëtimi i Kurtit, përplasës me perëndimin, rrezikon vet shtetësinë e Republikës.

“Në vend se të sillet si një Kryeministër i përgjegjshëm, një që ruan partneritetet e avancon kauzat kombëtare drejt perëndimit, ai sjellë krizë dhe izolim. Aventura e tij politike nuk mund të jetë përfaqësimi ynë popullor. Kosovës i duhen miqtë. Kosovës i duhen partnerët strategjik”, ka thënë Abdixhiku.

Lajm alarmues, e cilësoi edhe Kryetari i Partisë Demokratike të Kosovës (PDK), Memli Krasniqi.

I pari i PDK-së ka thënë në kohën kur aleatët perëndimorë janë “të zhgënjyer” me Qeverinë e Kosovës, kemi nevojë për Shqipërinë.

“ALARMUESE! Në kohën kur të gjithë aleatët perëndimorë janë të zhgënjyer me Qeverinë e Kosovës, ne kemi nevojë për Shqipërinë më shumë se kurrë!”, ka shkruar Krasniqi, raporton Express.

Ndryshe, kryeministri i Shqipërisë, Edi Rama, tha se i ka kërkuar homologut të tij nga Kosova, Albin Kurti, që të ndryshohet formati i mbledhjes së dy qeverive, që është paraparë të mbahet në Gjakovë më 14 qershor, por ai nuk ka pranuar.

“E kam informuar kryeministrin Kurti se në kushtet e agravimit të marrëdhënieve të Kosovës me krejt bashkësinë euroatlantike, ky takim nuk mund të mbahet në formatin e parashikuar”, tha Rama gjatë konferencës së jashtëzakonshme për media.

Ndërkaq, për AAK-në, situata kurrë nuk ka qenë më e rëndë.

Në një reagim, AAK vlerëson se situata më e rëndë në politikë, diplomaci dhe siguri në Kosovë nuk ka qenë asnjëherë më e rëndë.

“Kërkojmë nga kryeministri Kurti që urgjentisht t’i bashkërendojë veprimet me aleatët ndërkombëtarë, me ShBA-të në veçanti, para se gjendja të eskalojë e të marrë kahje edhe më të rëndë!”, thuhet në reagimin e kësaj partie.

Kryeministri i Shqipërisë tha se ndjen keqardhje që nuk gjeti dakordësi me kryeministrin Kurti për një ndryshim të formatit.