Britania dhe Danimarka njoftuan të enjten në konferencën ndërkombëtare të donatorëve në Kopenhagë se do ta ndihmojnë Ukrainën edhe më tej me para dhe armë, shkruan Reuters, transmeton Gazeta10.

Britania përmes një deklarate tha se do të furnizojë Ukrainën me më shumë sisteme raketash me shumë lëshime që mund të godasin objektivat deri në 80 km (50 milje) larg.

Sekretari britanik i Mbrojtjes Ben Ëallace tha se furnizimi me armë do të ndihmonte Ukrainën të mbrohet kundër artilerisë së rëndë ruse.

Danimarka ndërkohë do të rrisë ndihmën e saj financiare për Ukrainën me 110 milionë euro (113.6 milionë dollarë), tha kryeministrja Mette Frederiksen në konferencën ku morën pjesë disa ministra evropianë të mbrojtjes.

“Kjo është një luftë mbi vlerat mbi të cilat është ndërtuar Evropa dhe bota e lirë… Sot ne riafirmojmë angazhimin tonë për të mbështetur Ukrainën,” tha ajo.

Konferenca, e cila organizohet nga Ukraina, Danimarka dhe Britania, mbahet për të diskutuar mbështetjen afatgjatë për Ukrainën pas pushtimit rus.

Moska thotë se po kryen një “operacion special ushtarak” në Ukrainë që synon të mbrojë sigurinë e Rusisë kundër zgjerimit të NATO-s. / Gazeta10.