Flukset e tubacioneve të naftës ruse rifilluan në Evropën Qendrore të mërkurën, duke i dhënë fund një ndalese gjashtë-ditore, pasi grupi hungarez MOL pagoi tarifat e tranzitit që i detyrohej Ukrainës, duke ofruar një zgjidhje të përkohshme për ndërprerjen e fundit të furnizimeve ruse me energji, shkruan Reuters, transmeton Gazeta10.

MOL tha se nafta po qarkullon përsëri nëpër degën jugore të tubacionit Druzhba, që kishte arritur në Sllovaki dhe duhet të arrij në Hungari të enjten. Flukset e naftës, megjithatë, nuk pritet të rifillojnë në Republikën Çeke.

Të martën, monopoli rus i tubacioneve “Transneft” tha se flukset e tubacioneve ishin pezulluar në pjesën e Evropës Qendrore që nga 4 gushti për shkak se sanksionet perëndimore penguan pagesën e tarifave të tranzitit nga Moska në Ukrainë.

Hungaria ka kritikuar sanksionet e Bashkimit Evropian kundër Moskës.

Pezullimi i Druzhbës rriti çmimet e naftës, të cilat tashmë janë rritur së bashku me ato për format e tjera të energjisë, pasi pushtimi rus ndaj Ukrainës ka ngritur shqetësime për mungesa të derivative, veçanërisht në Evropë e cila varet nga karburanti rus. / Gazeta10