Anëtari i PSD-së, Nol Nushi në një intervistë në “Prime Time”, ka folur rreth aksionit të sotëm që e bëri në studion e lajmeve të transmetuesit publik, duke hyrë me një parullë që mbante mbishkrimin “Radio Televizioni Kurtit”.
Nushi, ka thënë se brenda studios së RTK-së ka hyrë pa i penguar askush madje nga hyrja kryesore.
“Televizioni është publik, ne aty kemi hy vazhdimisht si mysafir, e të ftuar e kështu me radhë. Edhe sot hymë andej ka hyhet nga hyrja kryesore e drejt te studio e lajmeve. Nuk u penguam nga askush, madje u përshëndeta me njerëzit që u takova rrugës dhe vazhdova. Ajo është hapësirë publike dhe e tillë duhet të jetë, nuk duhet të bie pre e këtij pushteti që po tenton të kap çdo institucion dhe t’i shtrij rrënjët e propagandës gjithandej. Në atë studio kam qenë edhe më herët e dita ku është, kam hy pa asnjë problem, RTK-ja i ka kamerat e sigurisë dhe s’mund të pretendoj që kam hy në mënyrë të dhunshme, kam hy nga hyrja kryesore.”, ka thënë Nushi.
Tutje, Nushi ka folur për udhëheqësit e RTK-së, duke aluduar në kapjen e televizionit publik nga pushteti”./Gazeta10