Presidentja e Kosovës, Vjosa Osmani, duke reaguar pas destabilizimit të veriut të Kosovës ka thënë se kjo përpjekje e Vuqiçit do të dështojë, shkruan Gazeta10.

Osmani ka thënë se reciprociteti nuk është i drejtuar kundër askujt por për të gjithë qytetarët pavarësish identiteteve të tyre.

E para e shtetit Osmani, ka ftuar qytetarët që të mos bëhen pjesë e propagandës së Beogradit.

Tutje, Osmani ka thënë se të gjitha institucionet e sigurisë janë duke punuar për të garantuar rendin dhe lirinë e lëvizjes, teksa ka shtuar se po ashtu janë duke u koordinuar me partnerët ndërkombëtarë.

Këtu keni statusin e plotë:

“Masa e reciprocitetit nuk është e drejtuar kundër askujt, por në favor të qytetarëve pa dallim përkatësie. Prandaj, ftoj qytetarët serbë të Republikës së Kosovës që të mos bien pre e propagandës nga Beogradi.

Policia e Kosovës dhe të gjitha institucionet e sigurisë po punojnë shumë për të garantuar respektimin e sundimit të ligjit dhe lirinë e lëvizjes. Jemi duke u koordinuar e punuar pandalur me partnerët tanë ndërkombëtar.

Përpjekjet e Vuqiçit për destabilizim të Kosovës, i cili po shërbehet me metoda të mentorit të tij- Putinit, do të dështojnë”, ka shkruar në llogarinë e saj në Facebook Osmani. / Gazeta10