Mjeku personal i presidentit  të Shteteve të Bashkuara të Amerikës, Donald Trump, ka deklaruar se kreu i Shtëpisë së Bardhë gëzon shëndet shumë të mirë dhe është plotësisht i aftë për të vazhduar ushtrimin e detyrës së tij presidenciale.

Konkluzionet janë përfshirë në raportin e fundit mjekësor të publikuar të premten mbrëma, pas ekzaminimeve rutinë vjetore të kryera në Qendrën Mjekësore Ushtarake Kombëtare Walter Reed.

Raporti është nënshkruar nga mjeku personal i presidentit, Dr. Sean Barmabella, dhe përmbledh rezultatet e kontrolleve mjekësore të zhvilluara gjatë javës së kaluar.

Sipas dokumentit të publikuar nga CNN, presidenti 79-vjeçar iu nënshtrua një sërë ekzaminimesh të detajuara, duke përfshirë skanime CT, teste të specializuara për zemrën, analiza laboratorike dhe kontrolle parandaluese për forma të ndryshme të kancerit.

Në procesin e vlerësimit morën pjesë gjithsej 22 specialistë nga fusha të ndryshme të mjekësisë, të cilët shqyrtuan gjendjen e përgjithshme shëndetësore të presidentit amerikan.

Mjekët kanë konstatuar se funksionet fizike dhe ato njohëse të Trumpit mbeten në nivel shumë të mirë, duke vlerësuar se ai posedon kapacitetin e nevojshëm fizik dhe mendor për të përmbushur përgjegjësitë që kërkon posti i presidentit të Shteteve të Bashkuara.

Vetë Trump kishte reaguar menjëherë pas përfundimit të ekzaminimeve, duke deklaruar se testet kishin kaluar “në mënyrë perfekte” dhe se ishte i kënaqur me rezultatet e tyre.

Raporti zbulon gjithashtu se pesha e presidentit aktualisht është 108 kilogramë, rreth gjashtë kilogramë më shumë krahasuar me vlerësimin e fundit zyrtar mjekësor të publikuar në prill të vitit 2025.

Për shkak të këtij ndryshimi, ekipi mjekësor ka rekomanduar disa masa shtesë që lidhen me regjimin ushqimor, aktivitetin fizik dhe menaxhimin e peshës trupore.

Megjithatë, specialistët kanë theksuar se këto rekomandime janë kryesisht parandaluese dhe nuk ndikojnë në vlerësimin e përgjithshëm të gjendjes shëndetësore të presidentit.

Në përfundim të raportit, stafi mjekësor e përshkruan gjendjen e Trumpit si “të shkëlqyer”, duke nënvizuar se performanca e tij fizike dhe njohëse mbetet në nivel të lartë pavarësisht moshës.