Zyrtarët e Komunës së Obiliqit kanë dalë në vendngjarje në objektin e ish-shkollës Teknike, ku gjatë punimeve për pastrimin e objektit janë hasur disa gjetje të pazakonta.

Objekti, nga i cili nxënësit shqiptarë ishin dëbuar në vitin 1990, ishte liruar këtë vit pas 27 vitesh uzurpim dhe Komuna e Obiliqit kishte nisur punën për pastrimin dhe rregullimin e tij.

Gjatë ndërhyrjeve në bodrumin e objektit janë hasur thasë të varur në tavan dhe një gropë e madhe, ndërsa sipas informacioneve të siguruara, në hapësirat e objektit është zbuluar edhe një ambulancë që dyshohet se i përkiste strukturave ilegale serbe.

Po ashtu, janë ngritur dyshime se në këtë objekt mund të ketë edhe një varrezë masive që lidhet me luftën e fundit në Kosovë.

Për këto pretendime deri më tani nuk ka konfirmim zyrtar nga institucionet përgjegjëse.

Në vendngjarje kanë arritur edhe njësitë e Policisë së Kosovës, ndërsa pritet që institucionet kompetente të sqarojnë natyrën e gjetjeve dhe nëse ato lidhen me ndonjë rast të periudhës së luftës.