Raporti: Gresa Bardhecaj

Sipas projektligjit për paga për zyrtarët publik, presidentja e vendit pritet të ketë pagën më të lartë në vend, ani pse ende nuk është bërë përcaktimi i vlerës monetare të koeficientit. Pas presidentes, pagën më të madhe do ta ketë kryetari i Gjykatës Kushtetuese, pasuar nga kryeministri i vendit, shkruan Kanal10.

Me gjithë vonesat e shumta, Qeveria e Kosovës më në fund e ka proceduar tutje Projektligjin për Paga.

E sipas këtij dokumenti, sërish politikanët do t’u prijnë të gjitha kategorive tjera, me pagat më të larta në vend.

Në rend të parë, do të jenë kryeministri dhe presidentja që pritet të jenë ndër më të paguarit.

E para e shtetit, koeficientin e pagës do ta ketë 18, pasuar nga kryetari i Gjykatës Kushtetuese 17.5, ndërkaq kryetari i Kuvendit dhe kryeministri, koeficientin do ta kenë 17, njësoj sikur kryeprokurori i shtetit dhe kryetari i Gjykatës Supreme.

Ndërkaq, sa i përket deputeteve të kuvendit dhe ministrave të kabinetit qeveritar, koeficienti do të jetë 16.4.

Kryetari i Gjykatës së Apelit do të ketë koeficientin 15.5, kurse ai i Gjykatës Themelore, 13.4.

Komandanti i Forcës së Sigurisë së Kosovës, koeficientin do ta ketë 15, pasuar nga gjenelarlejtnant me 14.5.

Koloneli koeficientin do ta ketë 12, togeri 8.2, kurse ushtari 5, raporton më tej Kanal10.

Drejtori i përgjithshëm i policisë, koeficientin do ta ketë 14.5, koloneli 10.2, kurse polici 4.4.

Ndërkaq, sa i përket sistemit arsimor, koeficientin më të lartë do ta ketë rektori, 14.2, pasuar nga dekani me 12.8 dhe profesori i rregullt 12.4

Drejtori i shkollës së mesme të lartë do ta ketë koeficientin 6.4, mësimdhënësit në shkolla të mesme 5.8, mësimdhënësit në shkollat fillore 5.6, kurse mësimdhënësit në institucionet parashkollore 5.2.

Kurse, drejtuesit e shëndetësisë koeficientin do ta kenë 12.4, mjeku specialist 12, kurse mjeku i përgjithshëm 7.4.

Përveç pagës bazë, edhe ky projektligj parasheh kompensime për angazhime shtesë të zyrtarëve publikë. /Gazeta10