Presidentja e Kosovës njoftoi të shtunën se zgjedhjet lokale në zonat me shumicë serbe në veri do të shtyhen deri në prill, një veprim që synon të qetësojë tensionet etnike që janë intensifikuar muajt e fundit, shkruan Reuters, transmeton Gazeta10.

Kryetarët serbë në komunat veriore të Kosovës, së bashku me gjykatësit vendas dhe rreth 600 policë, dhanë dorëheqjen muajin e kaluar në shenjë proteste ndaj një vendimi të qeverisë për të zëvendësuar targat e makinave të lëshuara nga Beogradi me ato të Prishtinës.

“Për të siguruar një pjesëmarrje të madhe në këto zgjedhje, për të pasur vëzhgues nga partnerët vendorë dhe ndërkombëtarë…vlerësimi im është se shtyrja është e nevojshme”, tha presidentja Vjosa Osmani para gazetarëve pas takimit me anëtarët e partive politike.

Serbët nga veriu i Kosovës bllokuan të shtunën rrugët kryesore në rajon për të protestuar kundër arrestimit të një ish-pjesëtari të policisë së Kosovës, i cili u largua nga posti i tij muajin e kaluar së bashku me serbët e tjerë etnikë.

Policia tha se bllokada i detyroi ata të mbyllnin dy pika kufitare ndërmjet Kosovës dhe Serbisë.

Sirenat kanë rënë në pjesën veriore të Mitrovicës dhe Zveçanin fqinj, pasi kamionët dhe rimorkiot janë përdorur për të bllokuar rrugët.

Petar Petkovic, kreu i Departamentit të Serbisë për Kosovën, tha se ish-polici Dejan Pantic ishte ndaluar në kufirin me Serbinë kur ai u kthye nga pazaret atje.

“Kjo është një hakmarrje brutale dhe frikësim nga (kryeministri i Kosovës, Albin) Kurti, i cili tani ka vendosur të persekutojë policët serbë pa asnjë bazë apo provë”, tha Petkovic në një deklaratë.

Policia në Prishtinë tha se Pantiç u arrestua për sulmin e dyshuar të zyrave të komisionit zgjedhor, oficerëve të policisë dhe zyrtarëve zgjedhorë të martën.

Më herët, policia e Kosovës ka arrestuar një tjetër serb, i dyshuar se ka marrë pjesë në një sulm të armatosur ndaj një patrulle policore. Të enjten, një polic u plagos në një sulm ndaj një patrulle pasi radhët e policisë në zonë ishin përforcuar nga oficerë joserbë pas dorëheqjeve masive. / Gazeta10