Avokati Tom V. Gashi ka zbuluar informacione të reja për rastin Dehari ku sipas postimit të bërë në rrjetin social Facebook, thuhet se arsyeja pse prindërit e Astritit kanë kërkuar përjashtimin e Prokurorit Afrim Shefkiu nga Hetimi i Vrasjes së djalit të tyre është se plagët e shkaktuara në ballë janë bërë me goditje me boks të hekurit, gjë që sipas tyre është neglizhuar nga personi në fjalë.

“… Prokurorit të Rastit i janë bërë dhjetëra kërkesa në të cilat ai nuk është përgjigjur asnjëherë dhe njëra prej tyre është që të kerkojë sqarime nga ekspertet e mjekësisë ligjore në Prishtinë lidhur me plagët e shkaktuara tek Astrit Dehari në ballë e që janë në forma sferike-rrumbullakëta dhe që kanë largësi e diametër të njëjtë dhe sipas te gjitha rrethanave janë shkaktuar me goditje me boks të hekurit. Prokurori zgjodhi rrugën e Heshtjes dhe për këtë arsye Prindërit e Astrit Deharit kanë kërkuar përjashtimin e Prokurorit Afrim Shefkiu nga Hetimi i Vrasjes së djalit të tyre Astrit Dehari”, shkruan Gashi në Facebook.

Avokati gjithashtu ka njoftuar se nesër do të mbajë konferencë për media lidhur me rastin./Gazeta 10