Të paktën tetë persona u vranë dhe 32 të tjerë u plagosën në Tajlandë të shtunën pasi një tren mallrash goditi një autobus në një kalim hekurudhor në Bangkok, duke shkaktuar një zjarr që përfshiu automjetin, thanë zyrtarët e shpëtimit dhe një zëvendësministër i transportit.

Zjarrfikësit dhe ekipet e shpëtimit u dërguan në ndihmë ndërsa flakët përfshiu autobusin publik dhe automjetet e afërta pranë stacionit Makkasan të Lidhjes Hekurudhore të Aeroportit, thanë zyrtarët, duke shtuar se në aksident u përfshinë edhe makina dhe motoçikleta, shkruan Reuters.

Raportet paraprake treguan se autobusi ishte ndaluar në shina në semaforin e kuq, duke penguar mbylljen e barrierave të kalimit, u tha gazetarëve zëvendësministri i Transportit Siripong Angkasakulkiat.

Treni, i cili po transportonte kontejnerë, nuk arriti të ndalonte në kohë për të shmangur përplasjen me autobusin, shtoi ai.

“Tetë persona u vranë dhe 32 u plagosën, ndërsa të plagosurit po trajtohen në spitale të ndryshme. Të tetë të vdekurit ishin në autobus”, tha ai.