Presidenti i Serbisë, Aleksandër Vuçiq ka thënë se serbët në Kosovë nuk mendojnë se Kosova është e pavarur, raporton Gazeta10.

Vuçiq në një intervistë të dhënë për televizionin publik serb RTS ka thënë se në zhvillimet e fundit në Kosovë ka qenë e përfshirë agjensia speciale e inteligjencës së Kosovës.

“Nuk kanë qenë njësitet e ROSU që e kanë bërë atë, por të ashtuquajturat agjenci speciale e inteligjencës. Task Forca, e cila drejtohet drejtpërdrejt nga Albin Kurti dhe Qeveria e Prishtinës dhe aksioni u drejtua nga Xhavit Tahiri”.

Vuçiq ka thënë se Kurti po i thotë Quintit se po luftojnë në veri kundër mafias dhe krimit por ata po i etiketojnë kështu vetëm ata që mendojnë se Kosova nuk është e pavarur.

“Kanë kapur një serb që nuk ishte as fajtor, i cili po transportonte ilaçe. Ata do të thonë se ai është fajtor se ka qenë në një demonstratë afër barrikadave. Epo të gjithë serbët janë në barrikada sepse nuk mendojnë se Kosova është shtet i pavarur dhe pastaj Kurti para Quintit thotë se po luftojnë kundër mafies dhe krimit. Dhe ata thonë natyrisht të gjithë serbët janë mafiozë përveç atyre që thonë se Kosova është e pavarur”. / Gazeta10