Petar Petkoviq – Drejtor i të ashtuquaturës Zyra për Kosovë në Serbi, ka thënë se me marrëveshjen e arritur dje, ruhen letërnjoftimet e serbëve që jetojnë në Kosovë, njëherësh paqja dhe stabilitieti. 

Petkoviq, e ka cilësuar një vendim shumë të rëndësishëm dhe domethënës pas një lufte të gjatë dhe të vështirë diplomatike në javët e fundit nga presidenti Vuçiq. 

“Ne arritëm të arrijmë një marrëveshje dhe të marrim garancitë e BE-së, që ishte gjëja më e rëndësishme për ne, dhe që në fakt do të thotë se ne arritëm të ruanim letërnjoftimet serbe për serbët që jetojnë në Kosovë”, tha Petkoviq për RTS. 

Ai tha se kartat e identitetit serb, dhe për rrjedhojë, siç thotë ai, ekzistenca e shtetit të Serbisë në zonën e Kosovës, janë ende të vlefshme, si dhe, sipas tij, serbët do të përdorin vetëm dokumentet e tyre, të cilat janë lëshuar nga Republika e Serbisë. 

“Ishim në prag të një krize dhe konflikti të rëndë, të cilin në radhë të parë e dëshironte Albin Kurti në veri të Kosovës, për të rindezur barutin në zonën e Ballkanit Perëndimor. Arritëm të vinim në një marrëveshje dhe të gjendet një zgjidhje… Serbët nuk do të heqin dorë nga targat KM”, tha Petkoviq. 

Teksa shtoi se  ky është “hapi i parë drejt normalizimit të marrëdhënieve, kur bëhet fjalë për respektimin e marrëveshjes për lirinë e lëvizjes.” 

“Ne jemi në pritje të bisedimeve edhe për çështjen e targave, ku situata është shumë më e vështirë, sepse Albin Kurti refuzon të pranojë targat KM, duke qenë se serbët në Republikën e Kosovës nuk do të heqin dorë nga targat KM, të cilat lëshohen nga Republika e Serbisë”, citohet të ketë thënë Petkoviq. 

Më tej, ai ka thënë se me pranimin e dokumenteve personale, tregon qartë se “nuk e njohim dhe as “do ta njohim kurrë pavarësinë e Kosovës. Ajo për të cilën është rënë dakord është një kompromis. Kjo është ajo që ne insistojmë gjatë gjithë kohës. Ne mund të ecim përpara dhe të arrijmë një marrëveshje, nëse ka një kompromis”, thotë Petkoviq./Gazeta10