Fushata e shumicës së mediave në Kosovë “Demokracia vdes në errësirë”, ka nxitur reagimin e Ministrisë së Industrisë, Tregtisë dhe Ndërmarrësisë.

Ata përmes një kumtese rreth një orë pas shfaqjes së afishes nëpër ekranet televizive dhe në uebfaqet e mediave, thonë se nuk e kanë synim sulmimin e mediave.

“Çështja ka të bëjë me regjistrimin e shoqërisë me përgjegjësi të kufizuar Klan Kosova. Bazuar në ligjin dhe aktet nënligjore në fuqi, të cilat kanë të bëjnë me regjistrimin e biznesit si person juridik, përveç dokumenteve të tjera, gjatë procesit të regjistrimit nga pala kërkohet që të sigurojë dëshminë e regjistrimit në vendin ku është regjistruar fillimisht”, thuhet në sqarim.

Më tej thuhet se vendimi i marrë nuk ka pasoja ligjore dhe se televizioni mund ta vazhdojë punën.

“Më 14 qershor, për shkak të shkeljes ligjore, Agjencia Kosovare për Regjistrimin e Bizneseve ka pezulluar përkohësisht certifikatën e biznesit për Klan Kosova Sh.P.K. Ky vendim nuk është përfundimtar i njëanshëm, pasi procedurat ligjore i mundësojnë Klan Kosova Sh.P.K. që brenda tridhjetë ditësh ta kundërshtojë pezullimin para Komisionit për Shqyrtimin e Ankesave për Regjistrimin e Bizneseve në Ministrinë e Industrisë, Ndërmarrësisë dhe Tregtisë. Si i tillë, vendimi aktual nuk ka pasoja ligjore, domethënë se Klan Kosova Sh.P.K mund të kryejë aktivitetet e saj derisa Komisioni të marrë vendim për këtë rast dhe të na udhëzojë se si të procedohet më tutje”.