Kryetari i Komunës së Gjakovës, Ardian Gjini ka bërë të ditur se janë ndarë 2 milionë e 541 mijë euro për vazhdimin e punimeve në stadiumin e qytetit.

Me këtë buxhet është paraparë ndërtimi i fushës së gjelbërt si dhe tribunat e lindës dhe jugut.

“Jam shumë i lumtur që sot nënshkruam dy kontrata për dy fazat në vazhdim për ndërtimin e Stadiumit të Qytetit. Do të ndërtohen tribuna lindje, tribuna jug dhe fusha e gjelbër. Ky investim i komunës për të dy llotet është në vlerë prej 2 milionë e 541 mijë euro”, ka shkruar Gjini në “Facebook”.

I pari i Komunës së Gjakovës gjithashtu ka bërë të ditur se tashmë janë nënshkruar kontrata me kompanitë që do t’i kryejnë këto punime.

Punimet për ndërtimin e stadiumit të qytetit në Gjakovë kishin filluar në fillim të vitit 2020, por më pas ato ishin ndalur.

Ekipi që luan në këtë stadium, Vëllaznimi bën gara në Ligën e Parë të Kosovës.