Kryeministri Albin Kurti ka dhënë një intervistë për mediumin publik të Sllovenisë derisa ishte në Forumin e Bledit një javë më parë.

Kurti atje ka folur për masat ndëshkuese të Bashkimit Europian ndaj Kosovës dhe se si po e dëmtojnë ato Kosovën.

“Kritikët ju akuzojnë se Kosova do të humbasë deri në 500 milionë euro nga fondet europiane IPA për shkak të politikës suaj të ashpër në veriun e Kosovës. Çfarë thoni për këtë?”, ishte pyetja e gazetares sllovene për Kurtin.

Kurti në përgjigje mohoi se është përgjegjës për situatën e fundit në veri të vendit, raporton Gazeta Express.

“Aktualisht, për shkak të situatës në veri të Kosovës, ndaj vendit tonë demokratik janë në fuqi disa sanksione apo masa të Bashkimit Europian. Edhe pse ne nuk jemi përgjegjës për këtë situatë. Përkundrazi, ne po luftojmë atje kundër ekstremistëve të dhunshëm që sulmuan ushtarët e KFOR-it, policët e Kosovës dhe gazetarët. Është e vërtetë që ne po vuajmë për shkak të këtyre sanksioneve. Kryesisht komuniteti ynë i biznesit, por edhe shërbimet shtetërore. Për shembull, Marrëveshja e Stabilizim-Asociimit është ngrirë, megjithëse ne e kemi përmbushur atë në 69 për qind. Huat dhe grantet si dhe financimet nga fondet e Bashkimit uvropian janë gjithashtu në rrezik. E gjithë kjo u ndërpre. Prandaj, heqja e këtyre masave ndaj Kosovës do të ishte vërtet e mirëseardhur dhe vendim i drejtë i Bashkimit Europian”, ka thënë Kurti.

Kryeministri kosovar përsëriti edhe për televizionin publik të Sllovenisë se në Veri duhet të funksionojë shteti i së drejtës.

“Është shumë e rëndësishme që ne t’i kemi të dyja: shtetin e së drejtës, pa ekstremistë të dhunshëm dhe sigurinë e paqen në anën tjetër. Mendoj se po vuan mospjesëmarrja e serbëve të Kosovës. Serbët e Kosovës që jetojnë në jug të Ibrit janë përgjithësisht të integruar mirë dhe përfitojnë prej tij [integrimit], ndërsa serbët në veri të Kosovës nuk jetojnë aq mirë sepse nuk janë të integruar. Pra, ata serbë që janë integruar jetojnë më mirë. Beogradi, natyrisht, po bën gjithçka për të penguar integrimin e serbëve në veri. Kjo dhunë nga Beogradi duhet të marrë fund dhe ne kemi nevojë për ndihmën e bashkësisë ndërkombëtare, veçanërisht të Bashkimit Europian”.