Kombëtarja Shqiptare është shumë afër të rishkruajë historinë duke u kualifikuar në kampionatin europian “EURO 2024” që do të mbahet vitin e ardhshëm në Gjermani.

“Kuqezinjët” aktualisht renditën në pozitën e parë në grupin E të kualifikimeve, me 13 pikë të grumbulluara dhe u duhet vetëm edhe një pikë për të siguruar kualifikimin në “EURO 2024”.

Një nga më meritorët për këtë suksese të kombëtares kuq e zi është pikërisht selektori brazilian, Sylvinho Mendes.

Përzgjedhësi brazilian mori drejtimin e Shqipërisë në janar të këtij viti dhe nënshkroi kontratë dyvjeçare.

Synimi i Sylvinhos ishte që në fillim i qartë, ta kualifikoj Shqipërinë në Europianin që do të mbahet vitin e ardhshëm në Gjermani.

Që nga ardhja e tij në krye të Shqipërisë, tekniku brazilian gjatë gjithë kohës jetonte në Shqipëri, duke shikuar shumë futbollistë nga liga të ndryshme të Europës dhe jashtë saj.

Një nga zbulimet e Sylvinhos është edhe 28-vjeçari, Jasir Asani, i cili nëndrejtimin e brazilianit u ftuar për herë të parë te Shqipëria dhe sulmuesi nga Shkup ka qenë njëri nga lojtarët kyç të “Kuqezinjëve” në këto eliminatore.

49-vjeçari e nisi me humbje rrugëtimin e tij te kombëtarja shqiptare, duke u mposhtur nga Polonia me rezultat 1-0 në Varshavë.

Përkundër humbjes, Shqipëria në atë ndeshje bëri një paraqitje mjaft të mirë, që ishte shpresëdhënëse për ndeshjet në vazhdim.

Në grumbullimin e qershorit, “Kuqezinjët” arritën dy fitore, ndaj Moldavisë dhe Ishujve Faroe, duke rritur kështu gjasat për një kualifikim të mundshëm.

Pas këtyre dy fitoreve, testi i vërtetë për të drejtuarit e Sylvinhos do të ishin dy ndeshjet e muajit shtator kundër Çekisë dhe Polonisë.

Në këtë grumbullim, selektori brazilian përforcoi fazën ofanzive me dyshen që më parë përfaqësonin Kosovën, Mirlind Dakun dhe Arbnor Mujën.

Në ndeshjen kundër Çekisë e cila u zhvillua në Pragë, Shqipëria barazoi me rezultat 1-1.

Përkundër disavantazhit, Shqipëria barazoi rezultatin me anë të Nedim Bajramit.

Vetëm tri ditë më pas, Shqipërinë e priste ndeshja kundër Polonisë në Tiranë, përballje kjo që mund të vendoste shumëçka në grup.

Në “Air Albania” e stërmbushur, “Kuqezinjtë” triumfuan me golat e Jasir Asanit dhe Mirlind Dakut, duke arritur kështu një nga fitoret më të rëndësishme në këto eliminatore.

Ndeshja e radhës ishte përsëri në Tiranë, por kësaj radhe kundër Çekisë. Edhe në këtë ballafaqim, “Air Albania” ishte i stërmbushur me shqiptare nga të gjitha trevat, që kishin udhëtuar për të parë këtë përballje vendimtare.

Shqipëria nuk dëshpëroi adhuruesit e saj në këtë ballafaqim, duke triumfuar me spektakël me shifrat 3-0.

Shqipërisë i duhet vetëm edhe një pikë për të kualifikuar dhe këtë gjë ka mundësi të bëjë në muajin nëntor, aty ku luan ndeshjet kundër Moldavisë dhe Ishujve Faroe.