Shefja e re e Politikës së Jashtme të BE-së, Kaja Kallas ka folur në platformën “X” për takimet e para, të ndara që ka pasur me kryeministrin e Republikës së Kosovës, Albin Kurti dhe presidentin e Serbisë, Aleksander Vuçiq.

Kallas në “X” ka thënë se e vetmja rrugë për anëtarësim në BE është ajo përmes normalizimit të raporteve mes dy shteteve, në bazë të Marrëveshjes së Ohrit.

Shefja e diplomacisë evropiane tha se mirëpret gatishmërinë për të bashkëpunuar plotësisht pas sulmit të fundit terrorist në Zubin Potok ku u dëmtua kanali i ujit të Ibër-Lepencit.

“U takova me Aleksandar Vuçiq dhe Albin Kurtin sot. Rruga e vetme për anëtarësim në BE është normalizimi i marrëdhënieve të tyre, në bazë të marrëveshjes së Ohrit.E mirëprita gatishmërinë për të bashkëpunuar plotësisht pas sulmit të fundit terrorist. Autorët duhet të përballen me drejtësinë”, ka shkruar Kallas në “X”.

Kryeministri Albin Kurti në ora 18:30 do të takohet edhe me Presidentin e Këshillit Evropian, Antonio Costa. Costa, do t’i takojë liderët e Ballkanit Perëndimor.

Sipas agjendës së publikuar në faqen zyrtare të BE-s, Presidenti i KE-së, Antonio Costa fillimisht do të pres në takim kreun e qeverisë shqiptare, Edi Ramën me fillim nga ora 17:00.

I met @avucic and @albinkurti today.

The only way to EU membership is through normalisation of their relations, on the basis of the Ohrid agreement.

I welcomed the readiness to fully cooperate after the recent terrorist attack. Perpetrators must face justice. pic.twitter.com/SRChOiwPb2

— Kaja Kallas (@kajakallas) December 3, 2024