Presidenti Donald Trump tha sërish të martën se të gjitha minat në Ngushticën e Hormuzit janë hequr ose shpërthyer – dhe kërcënoi se do të shkatërrojë çdo varkë që përpiqet të vendosë të tjera, raporton CNN.

“Jam njoftuar sapo nga Marina e Shteteve të Bashkuara se të gjitha minat janë hequr dhe/ose shpërthyer nga ujërat ndërkombëtare të Ngushticës së Hormuzit. Irani është njoftuar se çdo anije ose varkë që vendos mina të reja do të shkatërrohet menjëherë dhe në mënyrë sistematike”, shkroi Trump në një postim në Truth Social.

“Përmes Forcës Hapësinore, ne po monitorojmë çdo centimetër katror të Ngushticës, ashtu siç po bëjmë edhe me Pickaxe Mountain dhe tre objektet e tjera bërthamore tashmë të shkatërruara. Politika e Tolerancës Zero ndaj vendosjes së minave është plotësisht në fuqi dhe zbatim”, shtoi presidenti.

Trump ka pretenduar vazhdimisht se Marina e SHBA-së ka pastruar minat nga rruga ujore me rëndësi strategjike, përfshirë në deklaratat e tij javën e kaluar, ndërsa përpiqet të paraqesë përparim në mes të luftës me Iranin. Ai gjithashtu ka këmbëngulur se SHBA-ja e kontrollon ngushticën.

Në fillim të këtij muaji, Trump njoftoi anulimin e sulmeve të planifikuara amerikane ndaj Pickaxe Mountain, një objekt bërthamor i ndërtuar thellë nën tokë, për të cilin Izraeli beson se Irani e ka përdorur për të ruajtur një pjesë të rezervave të tij të uraniumit të pasuruar dhe centrifugat e avancuara.