Irani dhe Omani paraqitën të martën një propozim për të krijuar së bashku një kanal të përkohshëm lundrimi përmes Ngushticës së Hormuzit, sipas zyrtarëve rajonalë, pas disa javësh diskutimesh të tensionuara mes dy vendeve, raporton CNN.

Teherani dhe Maskati diskutuan një “kuadër me faza” për një projekt të përbashkët që do të mundësonte një “korridor të përkohshëm lundrimi” dhe do të “pastronte minat”, thuhet në një deklaratë për shtyp të ministrive të Jashtme të Iranit dhe Omanit.

Zyrtarët do të vazhdojnë bisedimet “me synimin për të arritur marrëveshje për një korridor të përhershëm lundrimi dhe administrimin e ardhshëm të Ngushticës”, shtohet në deklaratë.

Ministri i Jashtëm i Omanit, Badr bin Hamad Al Busaidi, vizitoi Iranin dhe zhvilloi konsultime me ministrin e Jashtëm iranian, Abbas Araghchi, raportoi më herët agjencia shtetërore e lajmeve të Omanit (ONA).

Pas takimit, ministri i Jashtëm i Omanit tha se ishte “shpresëplotë” që të dyja vendet “së shpejti do të njoftojnë një korridor të përkohshëm” për ngushticën. “Menaxhimi i ardhshëm i Ngushticës dhe një zgjidhje e përhershme do të pasojnë në kohën e duhur”, shkroi ai në X. “Diskutimet me partnerët rajonalë do të zhvillohen në mbështetje të paqes dhe bashkëpunimit, stabilitetit dhe lirisë së lundrimit”, shtoi Al Busaidi.

Araghchi shkroi në një postim në X se marrëveshja e propozuar tregonte se “angazhimi i Iranit ndaj paqes dhe stabilitetit shoqërohet me diplomaci të palëkundur me fqinjët tanë”.

Gjatë javëve të fundit, Teherani dhe Maskati zhvilluan negociata për të stabilizuar transportin detar në këtë rrugë ujore, e cila është shndërruar në një pikë kyçe presioni në bisedimet e bllokuara mes Iranit dhe SHBA-së, pas muajsh dhune rajonale.

Më herët gjatë ditës së sotme, presidenti i SHBA-së, Donald Trump, përsëriti se të gjitha minat në Ngushticën e Hormuzit janë hequr ose shpërthyer dhe kërcënoi se do të shkatërrojë çdo varkë që përpiqet të vendosë të tjera. “Ne po vëzhgojmë çdo centimetër katror të ngushticës”, tha ai.

Ndërkohë, kryeministri i Katarit, Sheikh Mohammed bin Abdulrahman bin Jassim Al-Thani, dhe ministri i Jashtëm iranian, Abbas Araghchi, zhvilluan një bisedë telefonike dhe diskutuan kanalin e përkohshëm të propozuar të lundrimit, njoftoi të martën Ministria e Jashtme e Katarit.

Katari ka shprehur më parë mbështetje për përpjekjet mes Omanit dhe Iranit për të arritur një marrëveshje lidhur me Ngushticën e Hormuzit, pavarësisht kërcënimit të presidentit të SHBA-së, Donald Trump, për të sulmuar Omanin nëse ai ndërhyn në operacionet amerikane në këtë rrugë strategjike ujore.