Sindikata e Policisë së Kosovës, sot në Pejë hapi turneun tradicional të lojërave sportive, i cili organizohet në shenjë nderimi dhe përkujtimi të zyrtarëve policorë të renë në kryerje të detyrës.

Në këtë ngjarje sportive morën pjesë përfaqësuesë nga sindikatat e rajonit dhe më gjerë, përfaqësuesë nga Komuna e Pejës, familjarë të policëve të rënë në kryerje të detyrës, si dhe menaxhmenti policor nga niveli qendror dhe ai lokal.

“Sindikata e PK-së në shenjë falënderimi ndau mirënjohje për përfaqësuesit e Sindikatave nga Shqipëria, Mali i Zi, Maqedonia e Veriut, Kroacia dhe përfaqësuesit nga Kuvendi Komunal i Pejës. Po ashtu, Sindikata e PK-së ndau një mirënjohje të veçantë për Këshillin Evropian të Sindikatave Policore (CESP) të cilët përmes zëvendës sekretarit të tyre, kishin adresuar një letër falënderimi për sindikatën e PK-së. Sindikatës së Policisë së Kosovës, nga zëvendës sekretari i përgjithshëm i Këshillit Evropian të Sindikatave Policore (CESP), Marian Kicev, iu kumtua lajmi pozitiv se Sindikatës së PK-së u është pranuar kanditatura në anëtarësim të CESPA- së. Në rastin e pranimit të kandidaturës, Kryetarit të Sindikatës, Zeqirit iu dhurua edhe një shenjë me mbishkrimin CESP.

Sindikata e PK-së pas anëtarësimit të plotë pritet të jetë anëtare me të drejta të barabarta krahas të gjitha sindikatave të policive evropiane. Sindikata e PK-së vazhdon t’i përkrah dhe mbështet zyrtarët policorë në aspektin sindikal, përfshirë dhe duke mos i harruar kurr edhe familjarët e policëve të renë në kryerje të detyrës, ku bijtë e tyre dhanë atë me sublimen, dhanë jetën e tyre në shërbim të vendit dhe qytetarëve të Kosovës”, thuhet në njoftim.