Bekim Sejdiu është emri për të cilin Lëvizja Vetëvendosje dhe Lidhja Demokratike e Kosovës kanë arritur dakordim si kandidat konsensual për president të Republikës së Kosovës.

Sejdiu është jurist, profesor universitar, diplomat dhe ish-gjyqtar i Gjykatës Kushtetuese të Kosovës. Karrierën e tij profesionale e ka zhvilluar në tri fusha kryesore – drejtësi, diplomaci dhe akademi – ndërsa për më shumë se dy dekada është i angazhuar edhe në arsimin universitar.

Nga akademia në diplomaci

Bekim Sejdiu ka lindur në vitin 1974. Studimet universitare në drejtësi i ka përfunduar në Universitetin e Prishtinës, ndërsa më pas ka vazhduar studimet pasuniversitare në fushën e marrëdhënieve ndërkombëtare, demokracisë dhe të drejtave të njeriut.

Ai ka përfunduar studimet master në marrëdhënie ndërkombëtare në Universitetin Bilkent në Ankara të Turqisë, ndërsa një tjetër master e ka kryer në fushën e demokracisë dhe të drejtave të njeriut, në kuadër të një programi të Universitetit të Sarajevës dhe Universitetit të Bolonjës.

Sejdiu ka doktoruar në studimet ndërkombëtare dhe diplomatike në Slloveni.

Në Universitetin e Prishtinës është i angazhuar si profesor në Fakultetin Juridik që nga viti 2002, me fokus kryesisht në të drejtën ndërkombëtare dhe fusha të ndërlidhura me marrëdhëniet ndërkombëtare.

Ambasadori i parë i Kosovës në Turqi

Karriera e tij institucionale mori një tjetër drejtim pas shpalljes së pavarësisë së Kosovës.

Në vitin 2008, Sejdiu u emërua ambasador i Republikës së Kosovës në Turqi, në një periudhë të rëndësishme për konsolidimin e diplomacisë së shtetit të ri.

Detyrën e ambasadorit në Ankara e ushtroi deri në vitin 2012.

Pas përfundimit të mandatit në Turqi, ai vazhdoi angazhimin diplomatik në Shtetet e Bashkuara të Amerikës. Nga viti 2012 deri në vitin 2014 shërbeu si Konsull i Përgjithshëm i Kosovës në Nju-Jork.

Para emërimit si ambasador, Sejdiu kishte shërbyer edhe si këshilltar politik në kabinetin e ministrit të parë të Punëve të Jashtme të Kosovës.
Gjashtë vjet në Gjykatën Kushtetuese

Në prill të vitit 2015, Bekim Sejdiu u emërua gjyqtar i Gjykatës Kushtetuese të Republikës së Kosovës.

Ai qëndroi në këtë institucion deri në vitin 2021, kur dha dorëheqje nga pozita e gjyqtarit.

Gjatë viteve në Gjykatën Kushtetuese, Sejdiu ishte pjesë e trupit gjykues në një numër rastesh të rëndësishme kushtetuese dhe institucionale.

Një prej rasteve më të rëndësishme të kësaj periudhe ishte rasti KO95/20, që kishte të bënte me zgjedhjen e Qeverisë së Avdullah Hotit.

Gjykata Kushtetuese në dhjetor të vitit 2020 konstatoi se vendimi i Kuvendit për zgjedhjen e Qeverisë Hoti nuk ishte në përputhje me Kushtetutën. Aktgjykimi kishte pasoja të drejtpërdrejta politike, pasi hapi rrugën për shpërndarjen e Kuvendit dhe zgjedhjet e reja parlamentare.

Sejdiu ishte pjesë e trupit gjykues që mori pjesë në shqyrtimin e këtij rasti.

Dorëheqja nga posti i gjyqtarit

Në maj të vitit 2021, Sejdiu dha dorëheqje nga Gjykata Kushtetuese.

Sipas njoftimit të atëhershëm të Gjykatës, dorëheqja ishte e lidhur me vazhdimin e karrierës së tij akademike në Universitetin e Prishtinës dhe përmbushjen e kritereve akademike për avancim.

Pas largimit nga Gjykata Kushtetuese, Sejdiu vazhdoi angazhimin në akademi dhe në hulumtime në fushën e drejtësisë dhe marrëdhënieve ndërkombëtare.

Ai është autor dhe bashkautor i punimeve shkencore që trajtojnë çështje të së drejtës ndërkombëtare, të drejtave të njeriut, diplomacisë, shtetndërtimit dhe zhvillimeve kushtetuese në Kosovë.

Kandidatura për president

Kryetari i LVV-së, Albin Kurti, dhe kryetari i LDK-së, Lumir Abdixhiku, kanë zhvilluar disa takime për të gjetur një kandidat që do të mund të siguronte mbështetjen e nevojshme në Kuvend.

Pas negociatave, palët kanë arritur dakordim për Bekim Sejdiun si kandidat konsensual për kreun e shtetit.

Kandidatura e tij vjen në një moment kur Kosova përballet me një ngërç institucional lidhur me zgjedhjen e presidentit. Mandati i presidentes Vjosa Osmani përfundoi në prill të vitit 2026, ndërsa detyrën e ushtrueses së presidentes e mban Albulena Haxhiu.

Për zgjedhjen e presidentit kërkohet pjesëmarrja e së paku 80 deputetëve. Në dy rundet e para kandidati duhet të marrë dy të tretat e votave të të gjithë deputetëve, pra 80 vota.

Nëse nuk arrihet kjo shumicë, në rundin e tretë kërkohet shumica e thjeshtë e të gjithë deputetëve, përkatësisht së paku 61 vota.
Një profil jashtë politikës partiake

Bekim Sejdiu nuk vjen nga një karrierë e drejtpërdrejtë politike partiake. Profili i tij është ndërtuar kryesisht në institucione shtetërore dhe akademike.

Ai ka qenë diplomat i Kosovës në vitet e para pas pavarësisë, profesor universitar dhe gjyqtar i Gjykatës Kushtetuese.

Përkrahësit e kandidaturës së tij e shohin këtë përvojë si një kombinim të drejtësisë, diplomacisë dhe akademisë – tri fusha që lidhen drejtpërdrejt me funksionin e presidentit, i cili ndër të tjera përfaqëson Kosovën në marrëdhëniet ndërkombëtare dhe garanton funksionimin kushtetues të institucioneve.

Tashmë mbetet të shihet nëse Sejdiu do të arrijë të sigurojë numrin e nevojshëm të votave në Kuvend për t’u zgjedhur presidenti i ardhshëm i Kosovës./Gazeta10