Lidhja Demokratike e Kosovës (LDK) do të zhvillojë nesër dy mbledhje të rëndësishme, pas marrëveshjes së arritur mes kryetarit të partisë, Lumir Abdixhiku, dhe kryeministrit në detyrë dhe kreut të Lëvizjes Vetëvendosje (LVV), Albin Kurti, që Bekim Sejdiu të jetë kandidati i përbashkët për President të Kosovës, mëson Insajderi.

Sipas burimeve, Abdixhiku fillimisht do të zhvillojë një mbledhje me Kryesinë e LDK-së, e cila është caktuar të nisë në ora 14:00. Dy orë më vonë, në ora 16:00, do të mbahet edhe takimi me Grupin Parlamentar të kësaj partie.

Kryetari i LDK-së deklaroi sot se marrëveshja me LVV-në për kandidaturën e Sejdiut për President përbën një “punë të mirë dhe të mbarë” për vendin.

Abdixhiku bëri thirrje që proceset institucionale të zhvillohen “pa vonesa”, duke kërkuar konstituimin e Kuvendit, formimin e Qeverisë së re dhe zgjedhjen e Bekim Sejdiut në postin e Presidentit të Kosovës.

“Andaj, pa vonesa, le të konstituojmë Kuvendin e Kosovës, le të zgjidhet Qeveria e Kosovës dhe le të zgjedhim presidentin e ardhshëm të Republikës së Kosovës, Prof. Dr. Bekim Sejdiun”, deklaroi Abdixhiku në konferencën e përbashkët për media me Albin Kurtin, ku ishte i pranishëm edhe kandidati për President, Bekim Sejdiu.