Ukraina ka kryer sulmin e saj më të madh me dron në rajonin e Moskës, tha kryebashkiaku, duke goditur rafinerinë kryesore të naftës në qytet dhe një ndërtesë banimi.

Kryebashkiaku Sergei Sobyanin tha se 450 dronë që po shkonin drejt kryeqytetit u rrëzuan në atë që ai e quajti “sulmi më masiv”. Guvernatori i rajonit tha se të paktën dy persona u vranë dhe 20 u plagosën.

Presidenti i Ukrainës, Volodymyr Zelensky, konfirmoi se Kievi kishte goditur me dronë dhe raketa një strukturë ruse të naftës dhe një vend logjistik në rajon, që përfaqësojnë “miliarda dollarë që mbështesin makinën e luftës”, shkruan BBC, përcjell KosovaPress.
Ndërkohë, zyrtarët ukrainas thanë se nëntë persona, përfshirë tre fëmijë, u vranë në sulmet ruse në rajonet e Kievit dhe Sumit të shtunën.

Rusia dhe Ukraina kohët e fundit kanë intensifikuar sulmet e tyre, duke synuar objektet e gjenerimit të energjisë dhe transportit, si dhe qendrat kryesore të logjistikës.

Një grua 44-vjeçare u vra në Sofyino të dielën pasi një dron goditi një ndërtesë banimi trekatëshe, tha kreu rajonal Andrei Vorobyev. Pesë persona të tjerë – përfshirë dy fëmijë – u plagosën.
Një burrë i moshuar vdiq pasi një shtëpi private u godit me bombë në distriktin Orekhovo-Zuevo, shtoi guvernatori Andrei Vorobyev.

Në mediat sociale janë shfaqur video që duket se tregojnë shpërthime në qiellin e natës mbi Moskë dhe një depo në flakë. Pamjet nuk janë verifikuar nga BBC.