Shkrimtarja dhe studiuesja e klasikës, kanadezja Anne Carson, është fituesja e Çmimit Nobel në Letërsi për vitin 2026.

Të enjten, Akademia Suedeze në Stokholm ia dha asaj çmimin për atë që e përshkroi si një “vepër të guximshme dhe novatore”.

Çmimi përfshin një shpërblim monetar prej 12 milionë koronash suedeze – afërsisht 1.2 milion dollarë, raporton CNN.
Anne Carson (76) është një studiuese e respektuar e klasikës, e cila ka dhënë mësim në universitete të ndryshme në Shtetet e Bashkuara dhe në Kanada.

Kritikët kanë vlerësuar esetë, prozën dhe poezinë e saj të veçantë, të cilat ndërthurin motive të lashta dhe bashkëkohore. Ajo është autore e veprave të tilla si The Beauty of the Husband, Autobiography of Red: A Novel in Verse dhe Nox.

Anders Olsson, kryetar i Komitetit të Nobelit për Letërsinë, shpjegoi se kombinimi i ideve, zhanreve dhe formave të ndryshme është thelbësor në veprën e saj. “Pothuajse e gjithë vepra e saj letrare përqendrohet te kryqëzimi i një obsesioni filologjik me fjalët dhe një dëshire poetike për kuptime të reja,” tha Olsson.