Policia e Ferizajt ka njoftuar se ka ndaluar një veturë të tipit BMW, e cila dyshohej se kishte shkaktuar një aksident trafiku me dëme materiale dhe ishte larguar nga vendi i ngjarjes.

“Me datën 07.11.2026, rreth orës 21:40, njësitet reaguese të stacionit policor në Ferizaj kanë ndaluar një veturë të tipit BMW me targa vendore, e cila dyshohej se kishte shkaktuar një aksident trafiku me dëme materiale dhe ishte larguar nga vendi i ngjarjes”, thuhet në njoftimin e Policisë.

Sipas Policisë, gjatë kontrollit te shoferi është gjetur një armë zjarri, për të cilën ai posedonte leje.

“Gjatë verifikimeve dhe kontrollit tek shoferi i veturës, A.J., 40 vjeç kanë gjetur në posedim një armë zjarri për të cilën posedonte leje”, thuhet në njoftim.

Policia ka bërë të ditur se i dyshuari është shoqëruar në stacion policor, ku njësiti i hetimeve ka kryer procedurat përkatëse.

“Me autorizimin e prokurorit të shtetit, ndaj të dyshuarit është iniciuar rasti për veprën penale ‘Mbajtja në pronësi, kontroll ose posedim të paautorizuar të armëve’, ndërsa i dyshuari është liruar në procedurë të rregullt hetimore”, thuhet në njoftimin e Policisë.

Policia tha se ka sekuestruar pistoletën me karikator dhe dhjetë fishekë.