Papa Leoni XIV do të nisë të hënën vizitën e tij të parë zyrtare në Argjentinë, në një udhëtim që pritet të tërheqë vëmendjen jo vetëm për rëndësinë fetare, por edhe për sfondin e tensioneve sociale dhe politike në vend.

Vizita vjen në një moment të vështirë për shumë kategori në nevojë, pas shkurtimeve të gjera të shpenzimeve publike nga presidenti Javier Milei.

Stacioni i parë i Papës, më 9 nëntor, do të jetë qendra katolike Cottolengo Don Orione, në Claypole, rreth 26 kilometra larg Buenos Airesit. Institucioni strehon rreth 400 persona me aftësi të kufizuara dhe po përgatitet prej ditësh për pritjen e kreut të Kishës Katolike.

Megjithatë, vizita zhvillohet në një periudhë të vështirë për këtë qendër. Koordinatori i saj, Fernando Montero, ka deklaruar se qeveria ka ndërprerë furnizimin me medikamente, ushqime të posaçme dhe pelena, duke shtuar se këto produkte nuk janë dërguar që prej nëntorit të kaluar dhe se çështja tashmë ndodhet në gjykatë.

Sipas Montero-s, qëndrimet e Papës dhe presidentit Milei janë krejtësisht të kundërta. Ndërsa Leoni XIV thekson dinjitetin njerëzor pavarësisht aftësisë për të qenë produktiv, kreu i shtetit argjentinas mbështet një model ekonomik të orientuar drejt konkurrencës dhe kufizimit të ndërhyrjes së shtetit.

Udhëtimi treditor në Argjentinë është pjesë e vizitës së Papës në Amerikën e Jugut, e cila përfshin edhe Uruguain dhe Perunë. Kjo është vizita e parë papale në Argjentinë që prej vitit 1987, kur vendin e vizitoi Papa Gjon Pali II. Edhe pse Papa i mëparshëm, Françesku, ishte argjentinas, ai nuk u kthye në atdhe gjatë pontifikatit të tij.

Vizita e Leoni XIV mund të sjellë momente të sikletshme për Javier Milein, i cili në të kaluarën ka pasur përplasje të forta verbale me Papa Françeskun. Në vitin 2020, Milei e kishte cilësuar atë si “idiot” dhe “përfaqësues të të Keqes në Tokë”, ndërsa e akuzonte se promovonte komunizmin. Megjithatë, pas takimit me Françeskun në Vatikan, në shkurt të vitit 2024, Milei pretendoi se i kishte kërkuar falje.

Që prej marrjes së detyrës në dhjetor 2023, presidenti argjentinas ka ndërmarrë shkurtime të konsiderueshme të shpenzimeve publike, duke argumentuar se ato ishin të nevojshme për të frenuar inflacionin. Por masat kanë ndikuar në fuqinë blerëse të pensionistëve dhe në financimin e shërbimeve sociale.

Sipas organizatës kërkimore Mate, pensionistët që marrin pensionin minimal, të cilët përbëjnë 63% të totalit, kanë humbur rreth 30% të fuqisë së tyre blerëse.

Pakënaqësia është shfaqur edhe në protestat e përjavshme të pensionistëve përpara Kongresit. Në protestën e fundit, një qytetar mbante një pankartë me mesazhin: “Na shpëto Papa Leoni XIV, Milei po na vret”.

Dallimet mes Papës dhe presidentit nuk kufizohen vetëm te politikat sociale. Leoni XIV ka bërë thirrje për vendosjen e kufizimeve ndaj inteligjencës artificiale, ndërsa Milei ka deklaruar se nuk synon të rregullojë këtë teknologji, duke mbështetur investime në qendra të dhënash dhe nisma që lidhen me zhvillimin e saj.

Sociologia dhe shkencëtarja kompjuterike Milagros Miceli, drejtuese e Critical AI Lab në Berlin, i ka cilësuar këto qëndrime si një kundërshti të dukshme. Sipas saj, Papa synon të vendosë njeriun në qendër të zhvillimit teknologjik, në një kohë kur qeveria argjentinase po ndjek një qasje tjetër.

Ndërkohë, financimi i institucioneve që kujdesen për personat me aftësi të kufizuara është kthyer në një pikë të rëndësishme mosmarrëveshjeje mes Kishës Katolike dhe qeverisë. Konferenca e Ipeshkvijve të Argjentinës i ka dërguar një letër ministrit të Shëndetësisë, Mario Lugones, duke denoncuar situatën e vështirë të institucioneve që ofrojnë kujdes për këta persona.

Presidenti Milei do ta presë Papën në aeroport të dielën, ndërsa të hënën Leoni XIV do të vizitojë qendrën Cottolengo Don Orione dhe më pas do të zhvillojë takime me përfaqësues të biznesit dhe sindikatave në Buenos Aires.

Të martën, ai do të kremtojë një meshë në ambientet e fabrikës shtetërore të avionëve ushtarakë FAdeA, në Córdoba, punonjësit e së cilës kanë protestuar kundër shkurtimeve të ndërmarra nga qeveria.

Pavarësisht përpjekjeve të kabinetit të Mileit për të minimizuar mundësinë e përplasjeve politike, vizita pritet të shoqërohet me vëmendje të veçantë ndaj mesazheve të Papës për varfërinë, punën, prodhimin vendas dhe të drejtat e personave në nevojë.

Një pjesë e madhe e argjentinasve, sipas raportimeve, presin që Leoni XIV të përcjellë një mesazh të përqendruar te drejtësia sociale dhe çështjet humanitare, duke rikthyer në vëmendje edhe trashëgiminë e Papa Françeskut në raport me shtresat më të varfra të shoqërisë.