Argjentina ka arritur që ta sigurojë një vend në mesin e 16 skuadrave më të mira të Kampionatit Botëror që po zhvillohet në Katar.

Këtë sukses skuadra e Lionel Scalonit e ka arritur duke iu falënderuar fitores ndaj Polonisë me rezultat 2-0 në rrethin e fundit të ndeshjeve në grupin C.

Pjesa e parë ishte tragjike për Argjentinën pasi ylli i tyre, Lionel Messi e humbi penalltinë në minutën e 39’, por situata ndryshoi për të mirë me të nisur pjesa e dytë.

Ishte Mac Allister ai që në minutën e 46’ e kaloi në avantazh Argjentinën, kurse Julion Alvarez vulosi fitoren e tyre me golin e tij në minutën e 67’.

Kështu Argjentina e mbyll si lidere e grupit C me gjashtë pikë, dy më shumë se Polonia e vendit të dytë.

Edhe Polonia është bërë pjesë e 16 skuadrave më të mira në Kampionatin Botëror, edhe pse ka pësuar disfatë me rezultat 2-0 në ndeshjen e fundit të grupit C.

Në fakt, kontribut të madh në kualifikimin e Polonisë ka dhënë ndeshja tjetër, ajo mes Arabisë Saudite dhe Meksikës e cila u mbyll me fitoren e meksikanëve me rezultat 2-1.

Kështu Polonia vazhdon tutje si e dyta në grupin C me katër pikë, ndërsa do të ballafaqohet me Francën në fazën tjetër të këtij kompeticioni.