Presidenti i Serbisë, Aleksandar Vuçiq ka pritur në takim të dërguarin special të Britanisë së Madhe për Ballkanin Perëndimor,  Stuart Pich, me të cilin ndër të tjera kanë diskutuar për Kosovën, raporton Gazeta10.

Ai e ka njoftuar të dërguarin britanik për qëndrimin e Serbisë në raport me situatën në rajon.

“Presidenti i Serbisë, Aleksandar Vuçiq, është takuar me të dërguarin special të Britanisë së Madhe për Ballkanin Perëndimor, Stuart Pich, të cilin e ka njoftuar për qëndrimin e Serbisë në lidhje me situatën aktuale në rajon, veçanërisht në Kosovë dhe Metohi”, shkruan Tanjug, transmeton Gazeta10.

Më tej, ai ka thënë se Serbia është e përkushtuar për paqe në rajon teksa ka theksuar pjesëmarrjen në nisma rajonale.  

“Theksova se Serbia, si gjithmonë deri më tani, mbetet sinqerisht e përkushtuar për ruajtjen e paqes në rajon, siç dëshmojnë iniciativat e shumta të integrimit rajonal, nismëtar i të cilave është vendi ynë”, ka shkruar Vuçiq në Instagram.

Tutje, ai ka thënë se për Serbinë tema kryesore është formimi i Asociacionit meqë Kosova e ka pranuar këtë obligim.

“Presidenti theksoi se për Serbinë çështja kyçe mbetet formimi i Bashkimit të Komunave Serbe, pasi që Prishtina ka marrë dhe ka pranuar obligimet në përputhje me marrëveshjet ndërkombëtare, si dhe siguria e popullatës serbe në Kosovë dhe Metohi, për të cilën ai pret. mbështetjen e plotë të Mbretërisë së Bashkuar”. / Gazeta10