Ballkani është shpallur kampion i Kosovës për herë të dytë radhazi dhe të dytën herë në histori të klubit.

Skuadra suharekase ka marrë urime edhe nga dy ekipet e mëdha evropiane, gjiganti kroat Dinamo Zagreb dhe ai italian AC Milan për titullin e fituar.

Ballkani ka publikuar urimet me shkrim nga dy skuadrat e mëdha duke i falënderuar ato.

“Kemi kënaqësinë që dy klube me traditë të futbollit evropian, na kanë dërguar telegrame urimi, me rastin e triumfit për të dytin vit me radhë, në Superligën e Kosovës në futboll. Është nder i madh për ne që të përgëzohemi prej njërit nga klubet më të trofeshëm dhe ikonik në botë, AC Milan. Njejtë, me nder e kënaqësi, kemi pranuar telegramin edhe nga klubi që ka shkruar historinë në futbollin e Kroacisë, Dinamo Zagreb”, thuhet ndër të tjera në njoftimin e klubit.

Ballkani do ta përfaqësojë futbollin kosovar në kualifikimet e Ligës së Kampionëve, aty ku në raundin e parë do të ndeshet me ekipin nga Bullgaria, Ludogorets.