Shkruan: Arben Ahmeti

Një pjesëtar i Ushtrisë Çlirimtare të Kosovës (Salih Mustafa) është dënuar me 26 vjet heqje lirie. Dënim kapital dhe dënimi më i ashpër për një pjesëmarrës direkt në luftërat e ish-Jugosllavisë. Më shumë nuk janë dënuar as ata që e shkaktuan Srebrenicën.

Nuk ka komandant zone në UÇK që nuk e ka kaluar një proces gjykimi pas luftës në Kosovë. Kjo nuk është kurrëfarë drejtësie e as drejtësi tranzicionale. Është fushatë si rezultat i investimit të madh të Serbisë, me qëllim që të manipulohet e vërteta. Nuk do të ishte kaq e suksesshme nëse nuk do të kishte edhe naivitet nga ana jonë. Tash kur personalitetet protagonistë të lirisë dhe pavarësisë janë në burg, Serbisë i konvenon ta harrojmë të kaluarën.

As në ëndrrat më të çmendura, Serbia nuk do të synonte rezultat më të mirë: Më shumë të dënuar në anën e shqiptarëve, protagonistët kryesorë në burg. Nuk mund të tejkalohet e kaluara. Jo pas kësaj fushate dhe pas këtij turpërimi. As nuk kemi çfarë të harrojmë e as çfarë të falim.

Unë besoj që kryeministri Kurti nuk do ta pranoj këtë. E kemi obligim të reagojmë të gjithë ndaj kësaj padrejtësie, obligim ndaj të ardhmes dhe së kaluarës. Duhet të reagojmë edhe për t’i shpëtuar burrat e gratë profesionistë të Speciales. Edhe ata janë viktima të një të pavërtete njësoj siç ishte Dick Marty.